Azərbaycan, Bakı, 30 yanvar / Trend , müxbir S.Əliyev, İ.Xəlilova/ Bakı Metropoliteni 2008-ci ildə 25 yeni vaqon almaq niyyətindədir. Bu barədə çərşənbə günü Bakı Metropoliteninin rəhbəri Tağı Əhmədov məlumat verib.
"Plan hələ hökumət tərəfindən təsdiq olunmalıdır" - deyə o bildirib. Metro ötən il də 25 vaqon əldə edib.
Bu il tikinti işlərinin davam etdirilməsi, stansiyaların yenidən qurulması, yeni vaqonların əldə edilməsi və digər məqsədlər üçün Metropoliten 130 mln. manatlıq məxaric smetasını Nazirlər Kabinetinə təqdim edib. Hökumət tərəfindən məbləğ 85 mln. manata qədər azaldıla bilər.
Əhmədov bildirib ki, bu il Bakı metrosunun yeni stansiyası - "Nəsimi"nin istifadəyə verilməsi planlaşdırılır.
"Cari ildə yeni stansiyanın istismara verilməsi ilə əlaqədar olaraq vaqonların artırılması lazımdır" - deyə Əhmədov vurğulayıb.
