Azərbaycan, Gəncə, 06 fevral / Trend , müxbir V.Məmmədov/ Gəncə şəhər Su Kanalı Törəmə Cəmiyyəti istifadə etdiyi elektrik enerjisinin haqqının müəyyən hissəsini ödəməsə, onlara verilən elektrik enerjisi yenidən kəsiləcək. Bu barədə çərşənbə günü Gəncə şəhər Regional Enerji Təchizatı MMC-in direktoru Eldar Eldarov məlumat verib.
Yanvar ayı ərzində su idarəsinə 165 min 648 manatlıq elektrik enerjisi verilib, nəticədə isə istifadə olunan enerjinin dəyərinin 2,4 faizi (4000 manat) ödənilib. Ödənişin aşağı olması səbəbindən şəhərin müxtəlif ərazilərində olan su anbarlarına və artezianlara verilən elektrik enerjisinin verilişi müvəqqəti dayandırılsa da, dünən gecə veriliş bərpa olunub.
Eldarov deyib ki, fevralın 10-na kimi istifadə olunan enerjiyə görə vəasit ödənilməsə, su anbarlarına və artezianlara verilən elektrik enerjisinin verilişi yenidən dayandırılacaq. Onun sözlərinə görə, ötən il Gəncə şəhər Su Kanalı Törəmə Cəmiyyətinin 2 milyon 213 min 364 manatlıq borcu qalmaqdadır.
Su Kanalı Törəmə Cəmiyyətinin baş mühəndisi Məmməd Hüseynovun bildirdiyinə görə, istifadə olunan elektrik enerjisinin dəyərinin ödənilməməsinin səbəbi istifadə edilən suyun dəyərinin yığılmamasıdır. "Yanvarda istifadə olunan suyun dəyərinin 38 faizini yığa bilmişik. Bu məbləğlə sıradan çıxan su nasoslarını təmir etdirmişik və işçilərin əmək haqlarını vermişik. Elektrik enerjisinin dəyərini tam ödəməyə imkanımız çatmayıb" Hüseynov əlavə edib.
Gəncə paytaxt Bakıdan 365 kilometr qərbdə yerləşir.
