Azərbaycan, Bakı, 07 fevral / Trend , müxbir İ.Xəlilova / 2007-ci il ərzində Azərbaycanın İqtisadi İnkişaf Nazirliyi sahibkarlıq subyektlərinin fəaliyyətinə ictimai birliklərin və ictimaiyyətin qanunsuz müdaxilə faktlarını aşkarlayıb. İqtisadi inkişaf naziri Heydər Babayevin bildirdiyinə görə, oxşar halların qarşısını almaq üçün ölkənin Ədliyyə Nazirliyinə məlumat verilib.
"Bu təşkilatların yoxlamalar aparmasına səlahiyyətləri olmadığından, onlara dəfələrlə xəbərdarlıq edilib", - nazir deyib.
Onun sözlərinə görə, ötən il yoxlamaların qeydiyyatı üçün İİN, sahibkarlara 45 mindən artıq yoxlama kitabçaları paylayıb. Nazirlik əməkdaşları 4356 sahibkarlıq subyektinin yoxlanılmasında iştirak ediblər. Bununla da, paralel yoxlamaların (sahibkarın eyni vaxtda dövlət orqanları ilə yoxlanılmaları) keçirilməsi hallarının qarşısı alınıb.
İqtisadi İnkişaf Nazirliyinə, dövlət orqanları yoxlamalarının nəticəsi haqqında, məhz keyfiyyət və kəmiyyət parametrlərindən prezidentə məlumat verməsi tapşırılıb.
Sahibkarlığın inkişafına yönələn tədbirlərin nəticəsində, ÜDM-də özəl bölmənin xüsusi çəkisi 84 faizədək artıb. Hazırda aqrar bölmədə, sənaye, ticarət, tikinti, nəqliyyat, mehmanxana biznesi və ictimai qida, özəl rabitə sektorunda istehsalın və xidmət sahəsinin payı 70- 99 faiz arasında dəyişilir. Nazir hesab edir ki, ölkədə, büdcə gəlirlərinin yarısından çoxu kimi , məşğulluq da özəl sektorun hesabına formalaşır.