Azərbaycan, Bakı, 11 fevral/ Trend , müxbir İ.Xəlilova, A.İsmayılova/ Azərbaycan hökuməti məcburi köçkünləri onların hazırda yaşadığı yerlərdən - ölkənin müxtəlif regionlarında yerləşən fin qəsəbələrindən yeni qəsəbələrə köçürməyə hazırlaşır. Bu barədə bazar ertəsi baş nazirin müavini, Qaçqın və Məcburi Köçkünlərlə İş üzrə Dövlət Komitəsinin sədri Əli Həsənov məlumat verib.
Hazırda 15 fin qəsəbəsində 25 min məcburi köçkün yaşayır. Həsənovun sözlərinə görə, köçürülmə haqqında qərar əhali ilə məsləhətləşmələrdən sonra qəbul ediləcək.
"Çox ehtimal ki, yeni qəsəbələr indikilərin yaxınlığında tikiləcək" - baş nazirin müavini dəqiqləşdirib.
İkinci mərhələdə hökumət bu gün hərbi hissə və orta təhsil müəssisələrində yaşayan məcburi köçkünləri köçürtmək niyyətindədir. Məktəblərdə 11 min, hərbi hissələrdə isə 6 min məcburi köçkün yaşayır. Bundan əlavə, hökumət bu gün yol kənarlarında və otlaqlarda yaşayan 300 min məcburi köçkünü mənzillə təmin etmək niyyətindədir. Həsənovun rəyinə görə, köçürtmə təxminən üç-dörd il çəkəcək. Lakin Bakının yataqxanalarında yaşayan məcburi köçkünlərin mənizllə təmin edilməsi nəzərdə tutulmur. Belə ki, hökumət onları təmir etmək niyyətindədir.
"Evləri qaçqınlar tərəfindən tutulan vətəndaşların problemlərinin həlli də diqqətdən kənarda qalmayacaq. Ölkə prezidenti bu məsələnin həlli üçün müvafiq dövlət strukturlarına tapşırıqlar verib" - Həsənov bildirib. Belə hallar əsasən Bakı və Sumqayıtdadır və hazırda hökumət bu evlərin sayını dəqiqləşdirir, həmçinin belə problemlərin həlli yollarını müəyyən edir.
"Bu problem dövlətin maliyyə imkanlarının artırılması ilə həll ediləcək. Evləri tutulan vətəndaşların hüquqlarının bərpa edilməsi vaxtı gəlib çatıb. Qərar araşdırmalardan dərhal sonra qəbul ediləcək" - Həsənov qeyd edib.
Müharibə dövründə, Azərbaycanın eks-prezidenti Heydər Əliyev 1995-ci ildə ermənilər tərəfindən işğal edilən torpaqlar qaytarılanadək məcburi köçkünləri təzə tikdikləri evlərdən çıxarmamaq haqqında sərəncam imzalayıb. Yüzlərlə vətəndaş məhkəmə instansiyalarında öz hüquqlarını bərpa etməyə çalışıblar, lakin nəticə olmayıb. Onlardan çoxu hətta İnsan Hüquqları üzrə Avropa Məhkəməsinə müraciət edib. Məhkəmə onların xeyrinə qərar qəbul edib və vurulan zərərə görə dövlətin öhdəsinə kompensasiya ödənməsi qoyulub.
Bu gün Azərbaycanda 800 mindən çox məcburi köçkün var.
2001-ci ildən bu günədək qaçqın və məcburi köçkünlərin sosial-məişət problemlərinin həlli üçün ARDNF-dən $352,4 mln. ayrılıb.
Müəlliflə əlaqə saxlamaq üçün elektron ünvan : [email protected]