Azərbaycan, Bakı, 12 fevral / Trend , müxbir S.Ağayeva/ Bakı-Tbilisi-Qars dəmir yolu layihəsi fevralıın 19-da Cenevrədə BMT-nin Avropa İqtisadi Komissiyasının (AİK) illik sessiyasında təqdim olunacaq. Bu barədə çərşənbə axşamı Berndən telefonla Azərbaycanın İsveçrədəki səfiri Elçin Əmirbəyov məlumat verib.
Bakı-Tbilisi-Qars layihəsi çərçivəsində 76 km-i Türkiyə, 29 km-i Gürcüstan ərazisindən keçəcək dəmir yolu magistralının 105 km-lik yeni qolunun tikilməsi planlaşdırılır. Bundan əlavə, nəql imkanlarını ildə 15 mln. ton yükə qədər qaldırmaq üçün Gürcüstanda Axalkalaki-Marabda-Tbilisi dəmir yolunun 183 km-lik hissəsi yenidən qurulacaq. Axalkalakidə həmçinin, Gürcüstanda mövcud olan xəttdən Avropaya qatarların keçidi üzrə məntəqəninin tikintisi planlaşdırılır. Layihə 422 mln. dollar, infrastruktur da nəzərə alınmaqla isə 600 mln. dollar dəyərində qiymətləndirilir.
Səfir bildirib ki, layihəni Azərbaycanın nəqliyyat naziri Ziya Məmmədov təqdim edəcək. Sessiyada iştirak çərçivəsində o, Avropa ölkələri nümayəndə heyətlərinin rəhbərləri ilə ikitərfli görüşlər keçirəcək. Səfir həmçinin bildirib ki, nazirin isveçrəli həmkarı ilə görüşü də planlaşdırılır.
AİK - BMT-nin beş regional komissiyalarından biridir. Avropa ölkələrinin müharibə zamanı məhv olmuş iqtisadiyyatının bərpasına yardım üçün İkinci Dünya müharibəsindən sonra yaradılıb. Ötən əsrin 90-ci illərinin əvvəlində komissiya əhəmiyyətli dərəcədə genişlənib. Avropa ölkələri, ABŞ, Kanada və İsraillə yanaşı, bura bütün keçmiş Sovet İttifaqı ölkələri də daxil olub.
Müəlliflə əlaqə saxlamaq üçün elektron ünvan : Seba
