Azərbaycan, Bakı, 15 fevral/ " , müxbir İ.Xəlilova/ Azərbaycan İnvestisiya Şirkəti (AİŞ) və Özəl Sektorun İnkişafı İslam Korporasiyası (İCD) birgə yaradılmış Xəzər Beynəlxalq İnvestisiya Şirkətinə (Caspian International Investment Company - CIIC) investisiya cəlb edilməsi üçün apreldə Fars körfəzi ölkələrində "road show" keçirməyə hazırlaşır. Bu barədə AİŞ-in icraçı direktorunun müavini Riad Qasımov məlumat verib. Ümumilikdə yeddi-səkkiz ölkəyə baş çəkmək planlaşdırılır ki, onların arasında Birləşmiş Ərəb Əmirlikləri, Bəhreyn, Qatar var.
"Korporasiyanın gözləmələrinə görə, CİİC-ə bu ölkələrdən ən azı $70 mln. cəlb ediləcək. Lakin bu məbləğin böyük olacağı istisna deyil. Bu, bizim heç bir xüsusi problemsiz cəlb edə biləcəyimiz minimal həddir" - Qasımov bildirib.
Fevralda CİİC-in yaradılması üzrə bütün hüquqi məsələləri baş çatdırmaq planlaşdırılır. Martın əvvəlində İslam Korporasiyası rəhbərliyinin missiyasının Bakıya səfər edəcəyi gözlənilir. Səfər çərçivəsində maliyyələşdirmə üçün daha çox perspektivli layihələr seçiləcək. CİİC apreldə fəaliyyətə (ofisin açılması) başlayır. Lakin Qasımov layihələrin reallaşdırılması istiqamətində problemlər olduğunu qeyd edib.
"Onların çoxu kifayət qədər məlumat və biznes plana malik deyil. Buna görə, CİİC TİƏ-nin hazırlanması üzrə işlər, bəzi layihələr üzrə marketinq araşdırmaları aparlmalıdır" - Qasımov qeyd edib.
Müzakirəyə kənd təsərrüfatı sahəsində layihələr, kommersiya məqsədli daşınmaz əmlak sahəsində iki layihə çıxarılıb. Bəzi layihələr isə regionlara istiqamətlənib. Direktor müavininin sözlərinə görə, AİŞ layihələrin əksəriyyətinin regionlarda həyata keçirilməsi üçün lobbiçilik edəcək.
AİŞ-dən fərqli olaraq, CİİC investisiya yatırmaq üçün minimal tələblər qoymayacaq və daha çevik sistemə malik olacaq. Hazırda maksimal məbləğ 10 mln. dollar səviyyəsində müəyyən edilib. Lakin CİİC Müşahidə Şurasının qərarı ilə bu məbləğ artırıla bilər.
CİİC-in yaradılması haqqında təsisat sazişi noyabrın 29-da Bakıda imzalanıb. İki il ərzində yaradılan şirkətin kapitalı $70 mln. təşkil edəcək. İlk əvvəl bu göstərici $3,4 mln. olub. AİŞ-in yeni şirkətin kapitalında iştirak payı $14 mln. (25 faizədək) təşkil edəcək.
Məqalə müəllifinin ünvanı: [email protected]
