Azərbaycan, Bakı, 10 aprel/ Trend , müxbir S.Babayev/ Azərbaycan Beynəlxalq Bankı Azərbaycanda qızıl və mis hasilatı ilə məşğul olan Anglo Asian Mining PLC şirkətinə $20 mln. kredit vəsaiti ayırıb. Bu barədə şirkətdən məlumat veriblər. Əvvəllər şirkət bankdan $5 mln. məbləğində təmin edilməmiş kredit alıb.
Kredit vəsaitləri Azərbaycanın Qərbində "Gədəbəy" yatağının işlənilməsi layihəsinin inkişafına yardım üçün nəzərdə tutulub.
Sazişə əsasən, kredit üzrə illik faiz dərəcəsi 15 faiz təşkil edir. Kredit iki il güzəştli dövr olmaqla dörd il müddətinə təqdim edilib. Qrafikə əsasən, kreditin ümumi həcmindən səkkiz mln. dollar 2010-cu ildə, qalan $5 mln. və $7 mln. isə müvafiq olaraq, 2011-ci ilin mart və iyununda ödəniləcək.
Şirkətin qiymətləndirməsinə görə, qabaqcadan nəzərdə tutulmayan xərclər də daxil olmaqla, layihənin dəyəri $40 mln.-u ötə bilər.
Anglo Asian Mining şirkətinin araşdırmalarına əsasən, minimum beş il ərzində yataqdan illik qızıl hasilatı 55-70 min unsiya səviyyəsində müəyyən edilib. Kapital yatırımları $25 mln-ı ötəcək. İstehsalat xərcləri unsiyasına görə, $275 aşağı səviyyədə gözlənilir.
Şirkət 1997-ci ilin avqustunda ölkənin Cənub-Qərbindəki yatağın işlənilməsi haqqında Azərbaycan hökuməti ilə müqavilə imzalayıb. Müqavilədə 49 faiz iştirak payı R.V. Investment Services Grour LLC-yə, 51 faiz isə Ekologiya Nazirliyinin simasında Azərbaycana məxsusdur.