Azərbaycan, Bakı, 01 may/ Trend , müxbir İ.Xəlilova/ Azərbaycan Beynəlxalq Bankı iri regional layihələrin reallaşdırılması ilə əlaqədar olaraq, Gürcüstanın kart bazarında fəaliyyətini genişləndirməyi planlaşdırır. ABB-in 100 faiz sahibi kimi çıxış etdiyi "Azərikard" prosessinq mərkəzinin Baş direktoru Elmar Sadıxov cümə axşamı bildirib ki, Azərbaycan Dövlət Neft Şirkətinin (ARDNŞ) Gürcüstandakı avtomobil yanacaq doldurma məntəqələri ABB-in POS-terminalları ilə təchiz olunacaq. Birinci YDM aprelin 25-də açılıb və ilin sonunadək onların ümumi sayı 25-ə çatdırılacaq.
"Bizim Gürcüstanda kart biznesinin inkişafına dair kifayət qədər böyük planlarımız var. Belə ki, bu ölkədə potensial var, - Sadıxov bildirib. Bizim bank vasitəsilə Bakı-Tbilisi-Qars dəmir yolunun Gürcüstan sahəsi maliyyələşdirilir, Bakı-Tbilisi-Ceyhan neft kəmərinin işçilərinə xidmət göstərilir".
O hesab edir ki, Gürcüstanda Dövlət Neft Şirkəti ilə bağlı kifayət qədər çox iş var. Onun layihələrində çalışan fiziki şəxslərə ABB-nin Gürcüstan filialı vasitəsilə xidmət göstəriləcək və onlar Visa International və MasterCard kartları ilə təmin ediləcəklər.
Beynəlxalq bank birinci il Gürcüstan üçün 5 min kart buraxmağı planlaşdırır. Lakin, Sadıxovun rəyinə görə, ABB-nin Gürcüstan üçün potensialı təqribən 50 min kart təşkil edir və bu kartlar yaxın bir neçə il ərzində buraxılacaq.
"ABB artıq Gürcüstanın ən iri banklarının onluğuna daxildir və yaxın bir neçə ildə ən yaxşı bankların beşliyinə düşə bilər", - "Azərikard" rəhbəri hesab edir.
Bu günədək ABB Azərbaycan bazarı üçün 1,6 mln. kart buraxıb.
Mayın 1-ə olan rəsmi məzənnə - 0,828 AZN/USD
Müəlliflə əlaqə saxlamaq üçün elektron ünvan: [email protected]