Azərbaycan, Bakı, 06 may/ Trend , müxbir İ.Xəlilova/ Azərbaycanın İqtisadi İnkişaf Nazirliyinin məsləhətçisi - Böyük Britaniyanın Curry& Brown şirkəti Bakı və Abşeronda bərk məişət tullantılarının idarə edilməsi üzrə strategiyanın layihəsinin hazırlanmasını başa çatdırıb. Bu barədə çərşənbə axşamı iqtisadi inkişaf nazirinin müavini Mikayıl Cabbarov məlumat verib.
"Biz Dünya Bankının ekspertləri ilə birlikdə sənədi müzakirə etmişik və onlar strategiyaya müsbət qiymət veriblər", - Cabbarov bildirib.
Onun sözlərinə görə, bu sahədə müvafiq strukturun yaradılması üzrə qərar qəbul edildiyi halda, strategiyanın mərhələli reallaşdırılmasına start veriləcək. Bakı ərazisinin məişət tullantılarından tam təmizlənməsi məqsədilə, "Təmiz şəhər" Səhmdar Cəmiyyətinin yaradılmasına dair sərəncam layihəsi artıq hazırlanıb. O, Nazirlər Kabinetinə təqdim edilib, hələlik, SC-nin yaradılacağı tarix hələ müəyyən edilməyib.
İlkin mərhələdə SC 100-faizlik dövlət müəssisəsi kimi yaradılacaq. Gələcəkdə strategiyaya müvafiq olaraq, müxtəlif komponentlər üzrə (emal, daşınma, basıdırılma) bələdiyyələr, özəl sektor cəlb edilə bilər. Cabbarovun rəyinə görə, dövlət uzunmüddətli perspektivdə, beş-yeddi ildən sonra SC-nin tərkibindən çıxa bilər.
"Dövlət ilk əvvəl müvafiq strukturu yaratmaq, onun səmərəli fəaliyyətini təmin etmək, və zəruri kapitallaşmanı həyata keçirmək, sonra isə, onun mərhələli şəkildə bələdiyyə və ya özəl sektora verilməsi imkanlarını nəzərdən keçirmək niyyətindədir", - nazir müavini dəqiqləşdirib.
Rəsmi məlumatlara görə, Bakı və onun ətrafında hər il 1 mln. ton məişət tullantısı toplanır. Bakının ətrafında üç məişət tullantıları poliqonu var.
Müəlliflə əlaqə saxlamaq üçün elektron ünvan: [email protected]
