Azərbaycan, Bakı, 08 may / " , müxbir U.İsmayılova/ Azərbaycanın iri "Joint Leasing" şirkəti təklif etdiyi məhsulların çeşidini daha da genişləndirərək kommersiya tipli daşınmaz əmlakın lizinqinə başlayıb. Bu barədə cümə axşamı şirkətin Baş direktoru Elçin Əhmədov məlumat verib.
"Kommersiya tipli daşınmaz əmlakın lizinqi proqramının şərtləri layihədən asılı olaraq müddəti 10 ilə qədər, faiz dərəcələri illik 18%-dən, avans ödənişləri 20%-dən olmaqla nəzərdə tutulub", - deyə Əhmədov bildirib.
Əhmədovun sözlərinə görə, yeni məhsul sahibkarlara, xüsusən də kiçik və orta sahibkarlığa daşınmaz əmlak alınması məsələlərində yardım etmək məqsədini daşıyır.
Əhmədov bildirib ki, "Joint Leasing" şirkəti çox perspektivli istiqamət kimi dəyərləndirdiyi bazarın bu seqmentində fəal iştirak etmək niyyətindədir.
Onun sözlərinə görə, hazırda şirkət dünyanın nüfuzlu avtomobil brendlərinin ölkəmizdəki distribütorları ilə birlikdə avtolizinq üzrə xüsusi layihələr işləyib hazırlayır.
"Joint Leasing"in lizinq portfeli sənaye və emal, səhiyyə, kənd təsərrüfatı, bank sektorları kimi sahələri əhatə edir.
"Joint Leasing" şirkətinin 1 yanvar 2008-ci il tarixinə olan lizinq portfeli 60 mln. dollar təşkil edir. Layihədən asılı olaraq təklif olunan lizinq üzrə faiz dərəcələri illik 18-20%, müddət - 3 il, avans ödənişləri - 20-25%-dir.
"Joint Leasing" QSC-nin təsisçiləri İngiltərənin Dolphin Leasing (52,3%) şirkəti və Azərbaycan Beynəlxalq Bankıdır. Şirkətin sələfi "Azərilizinq" QSC 1999-cu ildə yaradılıb və 2007-ci ildə səhmdarlarının strukturundakı dəyişikliklərlə əlaqədar "Azərilizinq" adını dəyişərək "Joint Leasing" brendi altında fəaliyyətini davam etdirməyə başlayıb.
Müəlliflə əlaqə saxlamaq üçün elektron ünvan : [email protected]
