Azərbaycan, Bakı, 08 may / Trend , müxbir İ.Xəlilova / "Doyche Borsa" Açıq Səhmdar Cəmiyyəti -Frankfurt birjasının operatoru Bakı Fond Birjasının (BFB) əməkdaşları və Azərbaycan brokerləri [Azərbaycanın Qiymətli Kağızlar bazarında bu gün 15 broker fəaliyyət göstərir] üçün Frankfurtda treninqlərin keçirilməsi üzrə imkanları öyrənməyə hazırdır. Bu barədə cümə axşamı BFB-nın prezidenti Xayal Abdinov bildirib.
Bu həftə Bakıya birinci səfər zamanı "Doyche Borsa" nümayəndələri həmkarlarını Frankfurt Birjasının imkanları ilə tanış ediblər. Təqdimat mərasimində BFB-nın əməkdaşları ilə yanaşı, Qiymətli Kağızlar üzrə Dövlət Komitəsi, Milli Depozit Mərkəzinin nümayəndələri, həmçinin, Azərbaycanın Qiymətli Kağızlar bazarının iştirakçıları iştirak ediblər. Bakı Fond Birjası, öz növbəsində, qonaqları ölkənin Qiymətli Kağızlar bazarının imkanları ilə tanış edib.
"Bu, "Doyche Borsa" nümayəndələrinin Azərbaycana tanışlıq səfəri idi, lakin biz Frankfurt Birjası ilə əməkdaşlığın genişlənəcəyinə ümid edirik. Biz yayın sonu və ya payızın əvvəlində Frankfurta qarşılıqlı səfər etmək niyyətindəyik"- deyə Abdinov bildirib.
Mayın 8-ə olan məzənnə 0,8292 AZN/USD təşkil edir.
Müəlliflə əlaqə saxlamaq üçün elektron ünvan : [email protected]