Azərbaycan, Bakı, 23 may/ Trend , müxbir İ.Xəlilova/ Azərbaycan hökuməti "Nordic Investment Bank" (NİB) ilə əməkdaşlıq haqqında çərçivə sazişi imzalamağa hazırlaşır. Bu barədə cümə günü İqtisadi İnkişaf Nazirliyindən məlumat veriblər. Bankla danışıqlar Avropa Yenidənqurma və İnkişaf Bankı idarəçilərinin illik iclası çərçivəsində bu həftənin əvvəlində, Kiyevdə keçirilib.
Nazirlikdən bildiriblər ki, bank Azərbaycan özəl sektoru ilə əməliyyatların genişləndirilməsinə hazırdır ki, bu da çərçivə sazişinin imzalanmasına imkan yaradacaq. "Nordic Investment Bank"da üzvlük üçün məhdudiyyətlər var və belə hüquqa yalnız Skandinaviya və Baltikyanı ölkələr malikdirlər. Buna görə də sazişin imzalanması üçün Azərbaycan əməkdaşlıq statusunu müəyyən etmək niyyətindədir.
Çərçivə sazişinin olmamasına baxmayaraq, "Nordic Investment Bank" artıq Azərbaycanda əməliyyatlar həyata keçirir. NİB ilə ilk kredit müqaviləsi 2008-ci ilin yanvarında Azərbaycan Beynəlxalq Bankı tərəfindən imzalanıb. Kredit müqaviləsinin məbləği 10 mln.avro olub. Sazişə əsasən, AİB 7 ilədək müddətlə vəsait cəlb edə bilər.
Cəlb edilən ehtiyatlar bank tərəfindən malların və ya xidmətlərin bir hissəsinin skandinav və ya baltikyanı mənşəyə malik olduğu investisiya layihələrinin maliyyələşdirilməsində istifadə edilə bilər. Sazişin şərtlərinə əsasən, vəsaitlər layihələrin reallaşdırılması ilə bağlı istənilən xərclərin ödənilməsi üçün istifadə edilə bilər. Bundan əlavə, "Nordic Investment Bank" ilə sazişin bağlanması ABB-yə bankın skandinav və baltikyanı ölkələrlə işgüzar əlaqələri olan korporativ müştərilərinin uzunmüddətli layihələrinin maliyyələşdirilməsini artırmağa imkan verəcək.
"Nordic Investment Bank" - aparıcı beynəlxalq maliyyə institutlarından biri 1975-ci ildə yaradılıb. Hazırda bankın iştirakçıları Danimarka, İslandiya, Norveç, Finlandiya, İsveç, Estoniya, Latviya və Litvadır. Bankın fəaliyyətində prioritet istiqamətlər həm iştirakçı ölkələrin ərazisində, həm də xaricdə sənaye sahələrində yüksək texnoloji investisiya layihələrinin maliyyələşdirilməsindən ibarətdir. Bankın məcmu aktivləri 18 mlrd. avro təşkil edir. Baş ofis Helsinkidə yerləşib.
Mayın 23-nə olan rəsmi məzənnə - 0,8235 AZN/USD.
Müəlliflə əlaqə saxlamaq üçün elektron ünvan: [email protected]
