Azərbaycan, Bakı, 27 may/ Trend , müxbir İ.Xəlilova/ Azərbaycanın Maliyyə Nazirliyi 2008-ci ildən etibarən, əlavə dəyər vergisindən (ƏDV) daxilolmaların yığılması üçün vahid xəzinədarlıq hesabının tətbiqinin nəticələrinin səmərəli olduğunu hesab edir. Belə ki, dörd ayın yekunları üzrə qeyri-neft sektoru üzrə ötən ilin analoji dövrü ilə müqayisədə, 220 faiz artım müşahidə olunur. Bu barədə maliyyə nazirinin müavini Azər Bayramov məlumat verib.
Lakin hökumət 2008-ci ilin yekunları üzrə vəziyyəti həm depozit ƏDV hesabları sisteminin tətbiqinə münasibətdə, həm də vergi ödəyicilərinin sayına görə qiymətləndirmək niyyətindədir. Bununla əlaqədar, hökumət artıq növbəti ildən ƏDV dərəcəsinin azaldılmasından hələlik imtina edib. İlin əvvəlinə ƏDV ödəyicilərinin sayı 10 min təşkil edib.
"Biz növbəti ilin mayına Vergi Məcəlləsinə dəyişikliklər çərçivəsində bunu davam etdirmək niyyətindəyik. Lakin, o 2010-cu ildən tətbiq olunacaq", - Bayramov bildirib.
ƏDV üzrə dərəcəni bir faiz azaldaraq, 17 faizə endirmək təklif olunur. Əvvəlcə bunu artıq növbəti ildən həyata keçirmək planlaşdırılırdı.
Vergilər Nazirliyi tərəfindən keçirilən araşdırmalara əsasən, Azərbaycan iqtisadiyyatında bugünkü vergi iqlimində optimal ƏDV dərəcəsi 14-15 faiz təşkil edir.
Müəlliflə əlaqə saxlamaq üçün elektron ünvan: [email protected]
