Azərbaycan, Bakı, 07 iyun / Trend , müxbir İ.Xəlilova/ Azərbaycanın İqtisadi İnkişaf Nazirliyi (İİN) Bakıda ilk zibilyandırma zavodunun tikintisi üzrə tenderin qalibi olan Fransanın "CNIM" şirkəti ilə müqavilənin texniki və maliyyə şərtlərinin müzakirəsini iyunun sonunadək başa çatdırmağı planlaşdırır. Bu barədə nazirliyin İnvestisiya siyasəti şöbəsinin müdiri Əsgər Ələkbərov bildirib.
Tenderdə ümumilikdə dörd şirkət iştirak edib. "CNIM" ilə yanaşı, Avstriyanın "EVN" şirkəti, Almaniyanın "Enconi" və Rusiyanın "Moskekostroy/Mosspetsstroy" şirkəti də iştirakçılar arasında olub. Zavodun tikintisi üçün şirkətlər tərəfindən təklif olunan müqavilələrin dəyəri 250 mln. ilə 450 mln. avro aralığında olub. Zavodun tikintisi üzrə xərclər dövlət vəsaitləri hesabına ödəniləcək.
Zavodun Balaxanıda, poliqonun yaxınlığındakı ərazidə tikilməsi nəzərdə tutulub. Onun illik imkanları 500 min ton təşkil edəcək. Podratçı üçün əsas şərt ən yaxşı təmizləmə texnologiyası və enerji alınması üzrə müəssisənin tikilməsindən ibarətdir. "CNIM" layihəsi tikinti işlərinin 32 ay müddəti ərzində başa çatdırılmasını nəzərdə tutur.
Ələkbərov bildirib ki, hazırda podratçı ilə zibilin yandırılması üzrə ödəniş, zavodun idərə olunması, ağır tullantıların yandırılması zamanı istifadə olunacaq təbii qazın alınması məsələləri müzakirə olunur. Belə ki, zavodun ərazisində elektrik stansiyasının tikintisi nəzərdə tutulur. Danışıqlar zamanı həmçinin, satılacaq enerji ilə qazın qarşılıqlı hesablaşma imkanları da müzakirə olunur. Elektrik stansiyasının illik gücü 231 MVt. təşkil edəcək.
"Enerji istehsalı zibilin tərkibindən asılı olacaq. Daha yüngül zibil yandırılacağı təqdirdə elektirik enerjisi istehsalı artacaq, buna görə də enerjinin istehsal həcmi dəyişə bilər", - deyə Ələkbərov bildirib.
Rəsmi məlumatlara görə, Bakı və onun ətrafında hər il bir qayda olaraq 1 mln. ton məişət tullantlıları yığılır.
Məqalə müəllifi ilə əlaqə ünvanı: capital