Azərbaycan, Bakı, 17 iyun/ Trend , müxbir İ.Xəlilova/ Beynəlxalq Maliyyə Korporasiyası (BMK) Azərbaycanda təkrar ipoteka bazarının yaradılması üzrə qanunvericiliyin ekspertizasını başa çatdırıb. Bu barədə çərşənbə axşamı, BMK-nın Mərkəzi Asiya və Azərbaycanda mənzil maliyyələşdirməsi sahəsində texniki yardım layihəsinin maliyyə analitiki Azər Əliyev məlumat verib. Korporasiyanın "İpoteka istiqrazları haqqında" qanun layihəsi üzrə təklifləri bu həftə Azərbaycanın Milli Bankına təqdim ediləcək.
Ölkədə sekyuritizasiyanın tətbiqi mərhələli xarakter daşıyacaq. AMB -də hesab edirlər ki, proses çətin olduğundan, ona dərhal başlamaq mümkün deyil. İlkin olaraq, ölkədə ipoteka istiqrazları institutlarının yaradılması, Azərbaycanın ipoteka bazarında həm yerli, həm də xarici sərmayədarların formalaşdırılması lazımdır.
Beynəlxalq təcrübəyə müvafiq olaraq, ayrı-ayrı özəl sərmayədarlar sabit sekyuritizasiya bazarına malik olmaq üçün kifayət deyil.
Azərbaycanda institusional sərmayədarların yaranması üçün yaxşı kapitallaşdırılmış sığorta şirkətləri, özəl pensiya fondları, aktivlərin idarə edilməsi üzrə şirkətlərin simasında artıq ilkin elementlər fəaliyyət göstərirlər və bu, özəl şəxslər və şirkətlərin gəlirlərinin artması ilə bağlıdır. Onların gəlirləri yalnız əmanətləri formalaşdırmağa deyil, həm də yalnız bank depozitlərinə malik olmayan, lakin aktivlərini idarə etmək üçün digər maliyyə alətlərinə malik olmaq istəyən sərmayədarlar institutlarını yaratmağa imkan verir. Milli Bank ilin sonunadək ölkədə sekyuritizasiyanın tətibiqi üçün hüquqi təkliflər hazırlamağı planlaşdırır.
AMB hesab edir ki, sığorta şirkətləri və yaxın vaxtlarda yaradılması nəzərdə tutulan özəl pensiya fondları ilə məhdudlaşmaq lazım deyil. Özəl investisiya şirkətləri, aktivlərin idarə edilməsi üzrə institutlar, institusional sərmayədarlar sərmayədar kimi çıxış edə bilərlər.
Azərbaycanın ipoteka bazarı bu gün təqribən $150 mln. təşkil edir. Sekyuritizasiya üzrə bir sazişə $100 mln. tələb olunur və buna görə, ölkədə bu alətin tətbiqinin vaxtından qabaq olduğu hesab edilir.
İyunun 17-nə olan cari məzənnə - 0,8176 AZN/USD.
Müəlliflə əlaqə saxlamaq üçün elektron ünvan: [email protected]
