Azərbaycan, Bakı, 02 iyul / Trend , müxbir E.İsmayılov/ Alman aviaşirkəti "Lufthansa"nın işçilərinin çərçənbə axşamı başladığı tətil başa çatıb. Keçirilən tətil "Lufthansa" aviaşirkətinin həyata keçirdiyi Bakı-Frankfurt-Bakı aviareysinin ləngiməsinə səbəb olub. Təyyarə Bakıdan Frankfurta çərşənbə günü Bakı vaxtilə saat 06.00-da uçub. Cədvələ əsasən, reys 03.40-da yerinə yetirilməli idi, - AZAL QSC -dən (Azərbaycanın Mülki Aviasiya İdarəsi) bildiriblər.
Almaniyada "Lufthansa" aviaşirkətinin minlərlə işçisi çərşənbə axşamı öz iş yerlərinə gəlməyiblər. Həmkarlar İttifaqı nümayəndələri bəyan edirlər ki, bu, şirkət rəhbərliyinin uçuş heyətinin və yerüstü xidmət əməkdaşlarının əmək haqlarının artırılmasından imtina etməsi ilə bağlıdır. Xəbərdarlıq tətilində həmkarların gözlədiyindən də artıq adam iştirak edib.
Tətil edənlər şirkətin 60 mindən artıq əməkdaşının əmək haqlarının 9,8 faiz artırılmasını tələb edirlər. Rəhbərlik isə əmək haqlarının tədricən 5,5 faiz artırılmasına razıdır. "Lufthansa" əməkdaşların əmək haqlarını il ərzində 3,4 faiz, daha sonra isə altı ay ərzində 2,1 faiz artırmağa hazırlaşır.
Eyni tələblərlə iyunun 23-də Frankfurt Mayn və Düsseldorf aeroportlarının əməkdaşları da çıxış ediblər.
