Azərbaycan, Bakı, 22 iyul/ Trend müxbir İ.Xəlilova/ Azərbaycanın bankları iyun ərzində iqtisadiyyatın kreditləşməsini 5,6 faiz artırıblar. Bu barədə çərşənbə axşamı Azərbaycan Milli Bankı (AMB) İdarə Heyətinin sədr müavini Rüfət Aslanlı məlumat verib. Hazırda bankların kredit yatırımları 6 mlrd. manata çatıb.
"Bu bankların guya AMB-nin göstərişi ilə kreditləşməni dayandırmaları barədə informasiyanın qeyri-düzgün olmasını təsdiqləyir", - Aslanlı qeyd edib.
Banklar məcburi şəkildə cəlb olunan vəsaitləri kredit və ya digər gəlir gətirən aktivlərə yerləşdirməlidirlər. Əks halda, onlar öhdəliklərin yerinə yetiriməsi zamanı problemlərlə qarşılaşa bilərlər. Bu, öz növbəsində, hər bankın və hətta ümumilikdə bütün maliyyə sisteminin qeyri-sabitliyi demək olar.
"Bununla əlaqədar, kreditləşmənin dayandırılması, həm kommersiya banklarının maraqlarına, həm də Milli Bankın maliyyə sisteminin sabitləşməsinə yönələn fəaliyyətinə uyğun deyil", - AMB İdarə Heyətinin sədr müavini dəqiqləşdirib.
Ümumilikdə hələ ötən ilin əvvəlində AMB bankları, bazardakı vəziyyətin bütün elementləri nəzərə almaqla, ehtiyatlı siyasət aparmağa çağırıb. Onun sözlərinə görə, banklar dinamik şəkildə artırlar. Bankların kredit portfeli, orta hesabla, 70 faiz artıb ki, bu da əhali və ümumilikdə iqtisadiyyatın maliyyə ehtiyatlarına olan tələbatının ödənilməsi zərurətindən irəli gəlir.
Lakin artım templəri daima institusional inkişafla müşaiyət olunmalıdır.
"Bununla əlaqədar biz bankları aktivlər və əməliyyatların artırılmasınadək institusional platforma yaratmağa çağırmışıq, - Aslanlı söyləyib. Bu gün Azərbaycan bankları, orta hesabla, 150-200 mln. manatlıq aktivləri idarə edirlər. Müvafiq olaraq, onların risk-menecmenti, kapitalın adekvatlılığı, korporativ idarəetmə sistemi ən yaxşı standartlara cavab verməlidir və biz banklardan bunu tələb edirik".
Normativlər pozularsa və bank qanunvericiliyinin tələbləri yerinə yetirilməzsə, Milli Bank banklara qarşı sanksiya tətbiq edir. Ötən ilin əvvəlində doqquz banka qarşı belə sanksiyalar tətbiq edilib. Onlara əmanət cəlb etməyi qadağan ediblər. 2008 - ci il iyulun 9 - da bu bankların ikisinin lisenziyası alınıb və artıq ləğvetmə prosesdurları başlayıb.
"Bu, ilk növbədə ,əmanətçilərin maraqlarının müdafiəsi, maliyyə sabitliyinin təmin edilməsi və bank səhmdarlarının sərmayələrinin müdafiəsi ilə bağlıdır", - AMB İdarə Heyətinin sədr müavini söyləyib.
Dünya maliyyə bazarlarında böhranla əlaqədar, Milli Bank kreditlər, girov təminatı, likvidliyin idarə edilməsi üzrə işin təkmilləşdirilməsi məqsədilə prudensial tənzimləmə normalarını gücləndirir, banklardakı cari nəzarət isə, əsasən risklərin idarə edilməsinə yönəldilir.
AMB bu tədiblərlə əlaqədar, 2008 - ci ildə bank göstəricilərinin artım templərinin azalacağını gözləyir.
Azərbaycanın Bank sistemi fəal xarici borclar və ölkəyə səhmdar kapitalın cəlb edilməsi nəticəsində, 2007- ci ildə, son dörd ildə ən yüksək inkişaf templərinə çatıb. İl ərzində bank sisteminin aktivləri 72 faiz, öhdəlikləri 59 faiz, depozitlər 48 faiz artıb.
İyulun 22-nə olan cari məzənnə -- 0,8048 AZN/USD.
Müəlliflə əlaqə saxlamaq üçün elektron ünvan: [email protected]
