Azərbaycan, Bakı, 27 avqust / Trend , müxbir Ü.İsmayılova/ Azərbaycanın Sığortaçılar Assosiasiyası, qrumun İdarə Heyətinin yeni sədrinin seçiləcəyi ümumi toplantının keçirilməsi üzrə ilkin tarixi müəyyən edib. Bu barədə çərşənbə günü Assosiasiya İdarə Heyətinin sədr müavini, sədr postuna iddiaçı Cəmil Məlikov bildirib.
"Növbəti ümumi toplantı, çox güman ki, sentyabrın 22-də keçiriləcək. Seçki yay tətili səbəbindən yubanıb", - deyə Məlikov bildirib.
Assosiasiyanın İdarə Heyətinin hazırki sədri Kamal İbrahimovun əvvəllər bildirdiyinə görə, Məlikovun bu posta keçməsi məsələsinin yubadılması iyulda Beynəlxalq Sığortaçılar Forumunun keçirilməsi ilə əlaqədardır.
İyulun 10-11-də Bakıda Azərbaycanın Sığortaçılar Assosiasiyasının təşkilatçılığı ilə I Azərbaycan Beynəlxalq Sığortaçılar Forumu keçirilib. Forum Azərbaycan Maliyyə Nazirliyinin dəstəyi ilə baş tutub.
Məlikovun sözlərinə görə, onun İdarə Heyətinin sədri postuna keçməsi ilə Assosiasiyanın hər il beynəlxalq forumun keçirilməsi və sığortaçılar məktəbinin inkişafı ilə bağlı tendensiyası davam edəcək.
"Digər planlar barədə danışa bilmərəm, çünki Assosiasiya kollektiv işdir və yeni ideyalar Assosiasiyanın bütün iştirakçıları tərəfindən hazırlanacaq", - deyə Məlikov bildirib.
Məlikovun Assosiasiyanın İdarə Heyətinin sədri postunu tutması strukturun Nizamnaməsində nəzərdə tutulub. Nizamnaməyə əsasən, Müşahidə Şurasına Azərbaycanın beş sığorta şirkəti (MBASK, Standard Insurance, Beynəlxalq Sığorta Şirkəti, Azersigorta, Ateshgah) daxildir. İlk iclasda "Standard Insurance"ın baş direktoru Kamil İbrahimov Müşahidəçilər Şurasının sədri, "MBASK" SŞ-nin İdarə Heyətinin sədri Cəmil Məlikov isə sədr müavini seçilib.
Azərbaycanın Sığortaçıları Assosiasiyası İdarə Heyətinin beş üzvündən hər biri növbə ilə bir il müddətinə struktura sədrlik edəcək.
Bütün fəaliyyət göstərən şirkətlərin daxil olduğu Azərbaycan Sığortaçıları Assosiasiyası 2006-cı ilin dekabrında təsis edilib.
Məqalə müəllifi ilə əlaqə ünvanı: capital
