Azərbaycan, Bakı, 08 sentyabr / Trend , müxbir Ü.İsmayılova/ Sentyabrın sonunda Azərbaycanın Daşınmaz Əmlakın Dövlət Reyestri Xidmətində Dünya Bankı (DB) ilə birgə layihə çərçivəsində daxili treninq-mərkəz işə başlayır, Dövlət Xidmətindən bazar ertəsi bildiriblər.
"Treninqlər həm Baş İdarə, həm də regional idarələrin əməkdaşları üçün keçiriləcək", - idarədə qeyd ediblər.
Treninqlər dövlət reyestr xidmətinin fəaliyyəti ilə bağlı mövzularda - daşınmaz əmlakın dövlət kadastrı, hüquqi xidmətlər, xidmətlərin keyfiyyətinin artırılması və sair mövzularda aparılacaq.
2007-ci ilin iyulunda Azərbaycan hökuməti və Dünya Bankı (DB) daşınmaz əmlakın vahid kadastrı sisteminin birgə aparılması barədə saziş imzalayıblar.
Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, layihənin siyasəti və idarə edilməsinin formalaşdırılması. Layihənin dəyəri $38,57 mln. təşkil edir ki, bunun da $30 mln.-u DB kreditinin payına düşür. Kredit ehtiyatları 5 il güzəştli dövr olmaqla 20 il müddətinə ayrılıb.
Müəlliflə əlaqə saxlamaq üçün elektron ünvan -- [email protected]
