Azərbaycan, Bakı, 17 sentyabr / Trend , müxbir İ.Xəlilova / Cari ilin səkkiz ayı ərzində bütün maliyyə mənbələrindən ölkənin iqtisadi və sosial sahələrinin inkişafına 5396,6 mln. manat yatırılb ki, bu da ötən ilin analoji dövrü ərzində əsas kapitala investisiya yatırımlarını 36,6 faiz üstələyir. Dövlət Statistika Komitəsindən çərşənbə günü bildiriblər ki, özəl mülkiyyətdə olan müəssisə və təşkilatlar əsas kapitala 2055,7 mln. manat (bütün investisiyaların 38,1 faizi), dövlət mülkiyyətində olanlar isə 3341,1 mln. manat (61,9 faiz) yatırıb.
Təmir-tikinti işlərinə yatırılan investisiyaların həcmi 53,8 faiz artaraq 3410,6 mln. manat təşkil edib. İstehsal təmayüllü obyektlərin tikintisi üçün 4069,3 mln. manat (75,4 faiz), qeyri-istehsal obyektləri üçün isə 1327,3 mln. manat (24,6 faiz) sərmayə yatırılıb.
Xüsusi çəkisi 29,1 faiz olan xarici investisiyalar 1 572,2 mln. manat təşkil edib. Müvafiq olaraq investisiyaların ümumi həcmindən 70,9 faiz (3824,4 mln. manat) daxili investisiyaların payına düşüb. Onların həcmi ötən ilin yanvar-avqustu ilə müqayisədə 69,7 faiz artıb, xarici investisiyalar isə 7,3 azalıb. Daxili investisiyaların böyük hissəsi (83,9 faiz) dövlət müəssisə və təşkilatlarına və yalnız 16,1 faiz özəl müəssisələrə yatırılıb.
Əsas kapitala yatırılan vəsaitlərin 35,3 faizi (1903,2 mln. manat) ölkənin neft sektorunun inkişafına, 64,7 faiz isə (3493,4 mln. manat) qeyri-neft sektorunun inkişafına yönəldilib. Qeyri-neft sektoruna yatırılan investisiyalar ötən ilin analoji dövrü ilə müqayisədə 89,2 faiz artıb.
Bununla yanaşı, investisiyaların 44,7 faizi sənaye sahələri, 3,5 faizi - kənd təsərrüfatı, 0,3 faiz - ticarət və xidmətlər, 24,8 faiz - nəqliyyat, 1,7 faiz - rabitə, 7,5 faiz - mənzil tikintisi, 2,6 faiz - səhiyyə, 4,4 faiz təhsil, 10,5 faiz digər sahələrin payına düşür.
Maliyyələşdirilməsi büdcə vəsaitləri hesabına həyata keçirilən obyektlərin tikintisinə 2147,9 mln. manat yatırılıb ki, bu da 2008-ci il dövlət büdcəsində kapital yatırımları üçün təsdiq edilən 4326,3 mln. manat həcmində vəsaitlərin 49,6 faizini təşkil edir. İstifadə edilmiş vəsaitlərin 3/4-dən çoxu təmir-tikinti işlərinə yönəldilib.
Müəssisə və təşkilatların hesabına əsas kapitala 2442,2 mln. manat (investisiyaların ümumi həcminin 45,2 faizi), bank kreditləri hesabına - 183,4 mln. manat (3,4 faiz), büdcə vəsaitləri - 2254 mln. manat (41,8 faiz), büdcədənkənar fondlar - 354,8 mln. manat (6,6 faiz), əhalinin şəxsi vəsaitləri - 159,9 mln. manat (3 faiz), digər vəsaitlər hesabına isə 2,3 mln. manat yatırılıb.
Sentyabrın 17-nə olan rəsmi məzənnə - 0,814 AZN/USD.
Müəlliflə əlaqə saxlamaq üçün elektron ünvan - [email protected]
