Azərbaycan, Bakı, 26 sentyabr / Trend , müxbir İ.Xəlilova/ Cümə günü Azərbaycan hökuməti və Dünya Bankı arasında $24 mln. dəyərində korporativ və dövlət sektorunda mühasibatın təkmilləşdirilməsi layihəsi (CAP/SAP) üzrə kredit sazişi imzalanıb.
Layihə DB-nin $11 mln. məbləğdə krediti, Yaponiyanın PHRD fondunun qrantı ($3 mln.), İsveçrənin iqtisadi məsələlər üzrə Dövlət Katibliyi Seco-nun ($2 mln.), Azərbaycan hökumətinin ($8 mln.) hesabına maliyyələşdirilir. Bu gün həmçinin yapon fondu ilə qrant sazişi imzalanıb. Seco ilə saziş Dövlət Katibliyində daxili prosedurlar başa çatdıqdan sonra imzalanacaq.
CAP/SAP-ın əsas məqsədi ölkədə beynəlxalq maliyyə hesabatlılığı (IFRS) standartlarına müvafiq milli standartların tətbiqidir. Layihə 2008-ci il martın 27-də DB Icraçı Şurası tərəfindən təsdiqlənib.
Layihə üzrə kommersiya sektorunda IFRS-nin tətbiqinə $6 mln., IPSAS (International Public Sector Accounting Standards), daxili maliyyə nəzarəti (Public Internal Finance Control) üçün $10 mln., həmçinin mühasibət və auditin idarə edilməsi sisteminin yaxşılaşdırılması üçün $9 mln. yönəltmək nəzərdə tutulur. İsveçrənin Dövlət Katibliyinin vəsaitləri dövlət gəlirlərinin (dövlət büdcəsi və dövlət müəssisələri) idarə edilməsi üzrə daxili maliyyə nəzarətinin təkmilləşdirilməsinə yönəldiləcək. Məsləhət xidmətləri Hesablama Palatasının müstəqil Ali Audit İnstitutuna çevrilməsində onun dəstəklənməsi üçün nəzərdə tutulub.
Azərbaycan artıq kommersiya sektoru üçün 28 milli standart hazırlayıb. Dünyada maliyyə hesabatlılığı və auditin 35 standartı mövcuddur. Ölkədə 2008-ci il yanvarın 1-dən dövlət sektoru üçün IFRS-ə keçid başlayıb.
Müəlliflə əlaqə saxlamaq üçün elektron ünvan: [email protected]
