Azərbaycan, Bakı, 12 noyabr/ Trend , müxbir İ.Xəlilova/ Azərbaycan hökuməti strateji valyuta ehtiyatlarının idarə edilməsi strategiyasına düzəlişlər edib və onun başlıca vəzifəsi gəlirlilik deyil, qorunmanın təmin edilməsidir, - Azərbaycan Milli Bankı İdarə Heyətinin sədri Elman Rüstəmov bildirib.
"AMB və Dövlət Neft Fondu ehtiyatların idarə edilməsində mühafizəkar siyasətə keçib və bu gün ehtiyatlar dünyanın aparıcı mərkəzi banklarında, o cümlədən də Dünya Bankında, Beynəlxalq Hesablamalar Bankında və suveren reytinqli təşkilatlarda saxlanılır", - Rüstəmov bildirib.
Milli Bank 2008-ci ildə sərəncamında olan valyuta ehtiyatlarının idarə edilməsindən 150 mln. dollaradək gəlir əldə edəcəyini gözləyir.
"Dünyada müşahidə edilən itkilər fonunda bu, yaxşı göstəricidir, - Rüstəmov bildirib. - Dövlət başçısının da prinsipial vəzifəsi bu mərhələdə valyuta ehtiyatlarının qorunması və müdafiəsidir. Belə ki, bu, ölkənin strateji ehtiyatlarıdır və burada ehtiyatlarla spekulyativ əməliyyatlar yolverilməzdir".
Rüstəmovun sözlərinə görə, bu tədbirlər 2009-cu ildə də davam etdiriləcək.
2008-ci ildə AMB portfelin valyuta kompozisiyasını balanslaşdırıb və bu gün onun sərəncamında olan valyuta ehtiyatlarının 60 faizi dollarda, qalan 40 faizi isə avro və funt sterlinqlərdə yeləşdirilib.
Valyuta ehtiyatları portfeli iki hissəyə ayrılıb - sərmayə və əməliyyat. Məhz bu səbəbdən də ehtiyatların böyük bir hissəsi Amerika valyutasında cəmləşdirilib.
Portfelin sərmayə hissəsi daim artır və bu gün onun payı təxminən 60 faiz təşkil edir. Əməliyyat hissəsi əsasən daxili tələbatlara, xarici borca xidmət göstərilməsi ilə bağlı olduğu üçün onun 90 faizi dollarda cəmləşdirilib.
Sərmayə portfelində avronun payı kifayət qədər böyükdür. Sərmayə portfeli müxtəlif alətlərdən ibarətdir. Bu portfeldə valyuta ehtiyatları depozitlər, qiymətli kağızlarda yerləşdirilib, bir hissəsi isə xarici idarəetməyə verilib.
Bu gün Azərbaycan Dövlət Neft Fondunun valyuta portfeli aşağıdakı nisbətdə balanslaşdırılıb: aktivlərin 50 faizi dollar ekvivalentində, 40 faizi avroda yerləşdirilməlidir. Qalan 10 faizin beş faizi funt sterlinqdə, beş faizi isə bu valyutalara və ya digər valyutalara yatırılıb. Rüb ərzində bu nisbət dəyişə bilsə də, yekunda bu həddə balanslaşdırılmalıdır. Noyabrın 12-nə Azərbaycanın strateji valyuta ehtiyatları 18,2 mlrd. dollar təşkil edib.
Müəllifl əlaqə saxlamaq üçün elektron ünvan: [email protected]
