Azərbaycan, Bakı, 13 noyabr/ Trend , müxbir İ.Xəlilova/ "Dünya böhranı şəraitində Azərbaycanın bank sektoruna etibarı artırmaq üçün Azərbaycan Əmanətlərin Sığortalanması Fondu (ADİF) vasitəsilə zəmanət verilən bank əmanətlərinin son həddini artırmaq məqsədəuyğun olardı", - parlamentin iqtisadi siyasət komissiyasının üzvü Dünyamin Xəlilov cümə axşamı Milli Məclisdə 2009 - cu ilin dövlət büdcəsi layihəsinin müzakirəsi zamanı bildirib.
Deputat ADİF-in qoruduğu əmanətlərin məbləğini hazırki altı min manatdan 20 - 25 min manatadək artırmağı təklif edib.
Azərbaycan Milli Bankı (AMB) ölkənin bank cəmiyyəti ilə bu məsələylə bağlı məsləhətləşmələr aparır. 2008 - ci ilin əvvəlindən maksimal sığorta edilən məbləğ 6 min manatadək artırılıb, 2010-cu il yanvarın 1-dən bu rəqəmiy səkkiz min manatadək çatdırılması gözlənilir. "Əmanətlərin sığortalanması haqqında" Qanuna görə, 2008-ci il yanvarın 1-dək Azərbaycanın Əmanətlərin Sığortalanması Fondundan 4 min manatadək əmanətlər tam qorunurdu.
[Qazaxıstan hökuməti artıq zəmanət məbləğinin 700 mn təngədən (5,8 min dollardan çox) beş milyon təngəyədək (42 min dollardan çox) artırılması barədə tədbirlər görüb. Bu, müştəri bazasının 99 faizini qorumağa imkan verir.]
Faiz dərəcələri AMB-nin uçot dərəcəsindən (bu gün 10 faiz) 1,8 dəfə çox olan əmanətlər ADİF tərəfindən sığortalanmayacaq. Yəni, banklar 18 faizdən yüksək dərəcə üzrə depozit qəbul edərkən, müştərini sığorta fondu tərəfindən əmanətin sığortalanmaması barədə məlumatlandırmağa borcludurlar.
Bankların Azərbaycan Əmanətlərin Sığortalanması Fonduna daxil olarkən ödədikləri birdəfəlik üzvlük haqqı (10 min manat) nəzərə alınmaqla, daxilolmaların ümumi həcmi 8897 min, sığorta olunan əmanətçilərin sayı 1275540 nəfər təşkil edir.
Fond 2007- ci il avqustun 13-də fəaliyyətə başlayıb.
Noyabrın 13 - nə olan cari mübadilə məzənnəsi -- 0,8104 AZN/USD.
Müəlliflə əlaqə saxlamaq üçün elektron ünvan: [email protected]
