Azərbaycan, Bakı, 14 noyabr/ Trend , müxbir İ.Əlizadə/ "2009 - cu ildə Azərbaycanın Hesablama Palatasının (HP) saxlanılmasına çəkilən xərclər 85 faiz artacaq", - Palatanın sədri Heydər Əsədov cümə günü parlamentin HP-nin gələn ilin büdcəsinin müzakirəsi üzrə plenar iclasında bildirib.
"2009 - cu ildə dövlət büdcəsindən 3585 min manat ayrılacaq. Bu, 2008-ci ilin maliyyələşdirmə həcmindən 1656 min manat çoxdur", - Əsədov bildirib.
Onun sözlərinə görə, Hesablama Palatası üçün əlavə maliyyələşdirmədən 1546 manat onun əməkdaşlarının əmək haqlarının ödənilməsinə və sosial xərclərinə sərf ediləcək. Qalan 110 min manat digər xərclər üçün nəzərdə tutulub.
"Hesablama Palatasının büdcəsi dövlət büdcəsinin tərkib hissəsi olsa da, qanunvericiliyə əsasən, ayrıca təsdiq olunmalıdır, - Əsədov bildirib. - Bu, maliyyə -nəzarət orqanının müstəqilliyinin təmin edilməsinə, digər qurumlardan maliyyə asılılığının aradan qaldırılmasına xidmət edir".
HP rəhbərinin sözlərinə görə, Maliyyə Nazirliyi Hesablama Palatasının təklifini tam nəzərə alıb və bu qurumun büdcəsini artırıb.
"2009 - cu ilin ortalarında Naxçıvan Muxtar Respublikasında Hesablama Palatası aparatının formalaşdırılması üçün əlavə maliyyələşdirməyə zərurət yarana bilər, - Əsədov bildirib. - Bu halda biz hökumətə müraciət edəcəyik".
Hesablama Palatası 2009-cu ildə yeni binaya köçməyi planlaşdırır.
Noyabrın 14-nə olan cari mübadilə məzənnəsi -- 0,8093 AZN/USD.
Müəlliflə əlaqə saxlamaq üçün elektron ünvan: [email protected]
