Azərbaycan, Bakı, 19 noyabr/ Trend , müxbir İ.Xəlilova/ İqtisadi inkişaf naziri Şahin Mustafayevin əmri ilə İqtisadi İnkişaf Nazirliyi (İİN) yanında İstehlak Bazarına Nəzarət Dövlət Xidmətinin yeni rəis müavini təyin edilib. O, həmçinin, müvəqqəti olaraq Dövlət Xidməti rəhbərinin səlahiyyətlərini icra edəcək. Bu barədə çərşənbə günü hökumətdəki mötəbər mənbələrdən məlum olub.
Dövlət Xidməti rəhbərinin səlahiyyətlərinin müvəqqəti icrası vəzifəsi Zahid İsayevə tapşırılıb. O, bu vəzifəyə təyinatadək SOCAR şirkətində (Azərbaycanın Dövlət Neft Şirkəti) İqtisadi Uçot İdarəsinin rəisi vəzifəsini tutub.
Paralel olaraq, nazirin sərəncamı ilə Dövlət Xidmətinin rəis müavini Fəraid Qəhrəmanov və şöbə rəhbərləri vəzifələrindən azad ediliblər.
İİN-in mətbuat xidmətində təyinatlar və işdən azad edilmələrlə bağlı bu məlumatı təsdiqləyiblər.
İqtisadi İnkişaf Nazirliyində kadr dəyişiklikləri noyabrın əvvəlində - yeni nazir təyin edildikdən sonra başlayıb və artıq bu həftədən boş qalmış yerlərə təyinatlar həyata keçirilir. Sahibkarlığa Kömək Milli Fondunun icraçı direktorunun müavini vəzifəzinə Şirzad Abdullayev təyin edilib. O, həm də Fondun direktorunun səlahiyyətlərini müvəqqəti icra edəcək.
Müəllifə əlaqə saxlamaq üçün elektron ünvan: [email protected]