Azərbaycan, Bakı, 24 noyabr/ Trend , müxbir İ.Xəlilova/ Asiya İnkişaf Bankı (AİB) Ağdaş, Göyçay və Naxçıvanda su təchizatı və sanitar xidmətlər sisteminin təkmilləşdirilməsi üzrə layihənin əhatə dairəsinin genişlənməsi ilə əlaqədar əlavə maliyyələşdirmə təqdim etməyə hazırdır, - Bankın Bakı nümayəndəliyindən bazar ertəsi bildiriblər.
"İlkin mərhələdə layihənin əhatə dairəsinin daha üç rayona genişləndirilməsi barədə razılıq əldə edilib. Onların sayının artacağı istisna edilmir", - nümayəndəlikdən bildiriblər.
Bu siyahıya Ağcabədi, Beyləqan və Balakəni əlavə etmək təklif olunur.
Nümayəndəlikdən əlavə sərmayələrin həcminin nə qədər olacağını bildirməkdə çətinlik çəkiblər ; bunun üçün yeni texniki-iqtisadi əsaslandırmanın hazırlanması tələb olunur. Bu istiqamətdə "Azərsu" SC ilə məsələ artıq işlənilir. Layihənin dəyərinin yenidən qiymətləndirilməsinə zərurət tikinti materiallarının dəyərinin bahalaşması ilə əlaqədar yaranıb.
[Əvvəllər layihənin bahalaşmasını yalnız Azərbaycan hökumətinin layihədəki iştirak payının artırılması hesabına ötmək planlaşdırılırdı.]
Layihənin hazırki dizaynı 2004-cü ildə hazırlanıb, bu dövr ərzində tikinti materiallarının qiymətləri xeyli artıb. Genişləndirmə nəzərə alınmadan, layihənin təxminən 5 - 6 mln. dollar bahalaşacağı gözlənilir. Azərbaycan tərəfinin təklifinə əsasən, layihənin əhatə etdiyi rayonlarda kanalizasiya sistemində müasir avadanlığın quraşdırılması da onun dəyərinə təsir edəcək.
Layihənin ilkin dəyəri 39,9 mln. dollar təşkil edib. Asiya Bankı onun maliyyələşdirilməsi üçün 30 mln. dollar ayırıb, 9,9 mln. dollar isə Azərbaycan hökumətinin payına düşür.
Cari ildən layihənin realizəsi canlansa da, tikinti işlərinə başlanılmayıb. Su kəmərinin çəkilməsi üçün podratçının müəyyənləşdirilməsi üzrə birinci tender təxminən 2008-ci ilin noyabrında yekunlaşdırılacaq.
Su layihəsi üzrə "Azərsu" SC-nin məsləhətçisi AICO Consulting Ltd/European Consultans Organization Konsorsiumudur. Konsorsium üç ilə nəzərdə tutulmuş işlərin detallaşdırılması üzər hesabat hazırlayıb.
Layihənin realizə dövründə - 2010 - cu ilədək Ağdaş, Göyçay və Naxçıvanda, əhatə zonası genişləndirilsə, Ağcabədi, Beyləqan və Balakəndə də su təchizatı sisteminin, infrastrukturun inkişafı üçün struktur dəyişiklikləri aparmaq planlaşdırılır.
Müəlliflə əlaqə saxlamaq üçün elektron ünvan: [email protected]