Gürcüstan, Tbilisi, 24 noyabr / Trend , müxbir N.Kirtsxaliya/ Gürcü - osetin münaqişəsi zamanı məhv edilən mülki aviasiyanın radar sisteminin bərpası və yenilənməsi məqsədilə, Fransa hökuməti Gürcüstana 4,7 mln. avro məbləğində borc verəcək. "Söhbət altı illik güzəştli kreditdən gedir", - Gürcüstanın iqtisadi inkişaf naziri Yekaterina Şaraşidze Fransa nümayəndə heyəti ilə görüşdən sonra deyib.
Nazir Fransanın xarici ticarət məsələləri üzrə dövlət katibi Ann - Mari İdrakla görüşüb. Görüşdə iqtisadi əməkdaşlıq və iki ölkə arasında azad ticarətin inkişafı məsələləri müzakirə olunub.
İdrakın fikrincə, bu səfər Fransa prezidenti Nikolya Sarkozinin Gürcüstanla münasibətlərin genişlənməsini nəzərdə tutuan təşəbbüslərinin davamıdır.
Şaraşidzenin sözlərinə görə, radar sisteminin yenilənməsi iqtisadiyyatın inkişafı ilə birbaşa bağlıdır, çünki mülki uçuşların təhlükəsizliyi tranzit yükdaşımalarını artırmağa imkan verəcək.
Gürcüstanda radar sistemi gələn ilin əvvəlində quraşdırılacaq.
Müəlliflə əlaqə ünvanı: [email protected]