Özbəkistan, Daşkənd, 25 noyabr / Trend , müxbir T.Jukov/ Özbəkistan əhalini
stabil qaydada əsas ərzaq məhsulları ilə təmin etmək üçün qış ehtiyatı yaradır, Trend -ın Daşkənddəki xüsusi nümayəndəsi xəbər verir.
Dekabrın 1-dək şəhərlilər üçün 25 min ton müxtəlif məhsul - kartof, soğan, düyü, un, bitki yağı, meyvə quruları, bostan bitkiləri yığılacaq, - Trend -a "Uzulqurjisavdoinvest" topdansatış ticarət müəssisələri assosiasiyasından deyiblər. Assosiasiyanın sədri Zəfər Fayziyevin sözlərinə görə, ərzaq və kənd təsərrüfatı məhsulları ehtiyatı həmin məhsulların qiymətinin əsaslandırılmamış şəkildə artırılmasına mane ola biləcək.
2008-ci ilin dekabrından gələn ilin mayınadək əhaliyə satış üçün meyvə-tərəvəz məhsulları və kartof ehtiyatlarının sistemli paylanmasına başlanacaq. Qış mövsümündə xüsusi diqqət uşaq bağçalarının, xəstəxanaların, məktəblərin və digər sosial sahələrin kənd təsərrüfatı məhsulları ilə təmininə yönələcək. İlin sonunadək assosiasiyanın müəssisələri istehlakçılara 160 mlrd. Sum məbləğində (117,6 mln. dollardan çox) 200 min ton un, 35 min ton bitki yağı, 11 min ton qənd, 10 min tondan çox düyü və digər ərzaq məhsulları satmaq niyyətindədir.
"Qlobal iqtisadi böhran istisnasız olaraq bütün ölkəyə təsir göstərib", - Fayziyev deyib. "Amma hələ yayda, bu problemdən az danışıldığı bir dövrdə bizim hökumət, respublika prezidenti ilk olaraq ərzaq bazarının davamlı təminatına və meyvə-tərəvəz məhsulları ehtiyatının yığılması işinin təşkilinə xüsusi diqqət ayırıb".
Özbəkistanda kənd təsərrüfatı məhsulları ixracından gələn mədaxil hesabına sosial əhəmiyyətli ərzaq məhsullarının gətirilməsilə bağlı müqavilələrin imzalanması üçün tədbirlər görülür. Assosiasiyanın məlumatına görə, 2008-ci ildə ixracdan (əsasən meyvə-tərəvəz məhsulları ixracından) gələn gəlir 30 mln. dollar olub. Rusiya və Qazaxıstana 11,5 mln. dollar dəyərində kənd təsərrüfatı məhsulları göndərilib. Kənd təsərrüfatı məhsulları ixracından gələn vəsait un, düyü və bitki yağı idxalına yönəlir.
Fayziyevin sözlərinə görə, meyvə və tərəvəz ixracından gələn mədaxil ölkədə məhdud şəkildə istehsal olunan və ya ümumiyyətlə olmayan malların idxalına sərf olunur. Bu gün üçün artıq 5 min ton düyü, 5,5 min ton bitki yağı, 500 ton digər məhsullar gətirilib. Tailanddan 10 min ton düyü idxalı üçün tədbirlər görülür.
Özbəkistan Dövlət Statistika Komitəsinin məlumatına görə, respublikaya ixrac olunan malların ümumi həcmində ərzaq məhsullarının payı 2008-ci ilin 9 ay ərzində 7,9 faiz olub (2007-ci ilin analoji dövrü ilə müqayisədə 14,3 faiz çox). Ərzağın əsas hissəsi MDB ölkələrindən alınıb.
Müəlliflə əlaqə ünvanı: [email protected]
