Azərbaycan, Bakı, 26 noyabr / , müxbir Ü.İsmayılova/ Azərbaycan Qiymətləndiricilər Cəmiyyəti 1998 - ci ildə qəbul olunan və müasir tələblərə cavab verməyən "Qiymətləndirmə fəaliyyəti haqqında" Qanuna düzəlişləri hökumətə təqdim etməyə hazırlaşır, - çərşənbə günü Cəmiyyətin sədri, millət vəkili Xanhüseyn Kazımlı " Azərbaycanda iqtisadiyyatın müasirləşməsi şərtlərində əmlak bazarı: qiymətləndirmə fəaliyyətinin inkişaf potensialı və bu sahədə beynəlxalq mübadilə" beynəlxalq konqresin gedişində bildirib.
"Əsas təkliflərdən biri qiymətləndiricilərin lisenziyalaşdırılmasıdır. Bu, 1998 - ci ildə ləğv olunub və hər kəsin bu fəaliyyətlə məşğul olmasına imkan yaranıb", - Kazımlı deyib.
Millət vəkilinin fikrincə, qiymətləndiricilik fəaliyyətinin sertifikatlaşdırılması vacibdir ki, bu sahə ilə yalnız düzgün qiymələndirmə üçün xüsusi təhsili olan şəxslər məşğul olsunlar.
Kazımlının sözlərinə görə, bu sahədə problem az deyil və bunlardan biri beynəlxalq standartların, o cümlədən daşınmaz əmlakın qiymətləndirilməsi üçün xüsusi əmsalın olmamasıdır. Bu gün Azərbaycanda belə əmsalın olmaması səbəbindən daşınmaz əmlak ın qiymətləri 1991 - ci il qiymətləri əsasında bazalaşır.
Azərbaycanda qiymətləndirmə, əsasən, daşınmaz əmlakla bağlı aparılır, bu peşəkarlıq baxımından düzgün deyil. Qiymətləndirmə daşınan əmlak, zərgərlik məmulatları və hətta əqli mülkiyyətə - maddi və qeyri -maddi ehtiyatlar sahəsinə də tətbiq edilməlidir.
Konqresdə müasir bazar və onun qiymətləndirilməsi məsələləri də müzakirə edilib. Tədbirdə Türkiyədən, ABŞ - dan, Belarusdan, Latviyadan, Moldovadan, Rusiyadan, Gürcüstandan, Qazaxıstandan və Qırğızıstandan olan ekspertlər də iştirak ediblər.
Qiymətləndiricilik fəaliyyətinin inkişafına həsr olunan tədbirlər BMK-nın texniki əməkdaşlıq layihəsinin II mərhələsi çərçivəsində keçirilir. Layihəni Maliyyə Korporasiyası İsveçrənin iqtisadi əlaqələr üzrə Dövlət Katibliyi ilə (State Secretariat for Economic Affairs - SECO) birgə keçirir. SECO regional qurum kimi, Mərkəzi Asiyanı da əhatə etsə də, onun vəsaitləri yalnız Azərbaycan üçün nəzərdə tutulub.
Azərbaycan Qiymətləndiricilər Cəmiyyəti üzvlərinin 80 nəfəri fiziki, 7 -si hüquqi şəxslərdir.
Müəlliflə əlaqə ünvanı: [email protected]
