Azərbaycan, Bakı, 02 dekabr/ Trend , müxbir S.Babayeva/ "Azərbaycanda elektron ticarətinə ƏDV tətbiqi məqsədəuyğun deyil", - deyə çərşənbə axşamı Silverkey-in Azərbaycandakı nümayəndəliyinin rəhbəri, ölkədə GoldenPay - ilk İnternet-ödəmə sisteminin yaradılması üzrə layihənin rəhbəri Fərid İsmayılzadə bildirib.
"Qərb ölkələrində elektron ticarətinin inkişafının stimullaşdırılması məqsədi ilə elektron ödəmələrinə ƏDV tətbiq edilmir", - deyə İsmayılzadə bildirib.
Hazırda Azərbaycan hökumətində elektron ödəmələrinə bu verginin tətbiq edilməsinin mümkünlüyü nəzərdən keçirilir.
"Bununla əlaqədar hökumətdə müzakirələr aparılacaq, lakin yekun qərarın necə olacağı hələ məlum deyil. Ola bilsin ki, bu fəaliyyət növü üçün ƏDF -nin faiz dərəcəsi mövcud olandan aşağı, yəni 10 faiz olacaq və ya digər güzəştli şərtlər tətbiq ediləcək", - deyə İsmayılzadə bildirib.
Hazırda Respublikada 18 faiz təşkil edən vahid ƏDV tətbiq olunur. 2010 - cu ildən onun bir faiz endirilməsi nəzərdə tutulur.
2009 -cu ildə vergi qanunvericiliyinə əlavələrin edilməsi nəzərdə tutulmur. Təkliflər paketi, 2010 -cu ildən onun tətbiq edilməsi üçün, gələn il müzakirə olunacaq.
Ekspertlərin hesablamalarına görə, 2011- ci ilədək Azərbaycanda elektron ticarət dövriyyəsi 300 mln. dollardan artıq ola bilər.
Məqalə müəllifi ilə əlaqə ünvanı - [email protected]
