Azərbaycan, Bakı, 06 yanvar/ Trend , müxbir İ.Xəlilova, N.İsmayılova/ Dünya Bankı üçüncü magistral yol çərçivəsində Azərbaycan hökuməti ilə yeni yol layihələrinin maliyyələşdirmə imkanlarının müzakirəsinə başlayır, - Azərbaycan Nəqliyyat Nazirliyindən çərşənbə axşamı bildiriblər.
Banka İmişli-Muğanlı, Yevlax-Balakən və Ələt-Şorsulu avtomobil yolları sahələrinin yenidənqurma layihələri təqdim edilib. Bəzi sahələrdə, xüsusilə də Ələt-Şorsulu avtomobil yolu sahəsində düzləndirmə, digər sahələrdə dövrələmə yolun çəkilməsi planlaşdırılır.
"Bankın nəqliyyat mütəxəssisi və gələcək layihənin rəhbəri Kristofer Bennet bu layihələrin müzakirəsi məqsədilə yanvarın 21-23-də Azərbaycanda səfərdə olacaq", - DB-nin Bakı nümayəndəliyindən bildiriblər.
"Bank ilkin olaraq bu layihələrin realizəsinə 280-300 mln. dollar vəsait ayırmağa hazır olduğunu bildirib", - hökumətdən qeyd ediblər. Yol layihələrinin dəyəri texniki-iqtisadi əsaslandırma (TİƏ) hazırlandıqdan sonra müəyyənləşəcək.
"Layihələrin bahalaşması ilə əlaqədar, inflyasiya nəzərə alınmaqla, hazırda onlar yenidən qiymətləndirilir və "Azəravtoyol" yanvarın sonunadək TİƏ-nin hazırlanmasını başa çatdıracaq", - nazirlikdən bildiriblər.
Hazırda bank artıq iki bir-birini tamamlayan layihəni maliyyələşdirir. Ələt-Masallı avtomagistralının genişləndirilməsi və marşrutunun dəyişdirilməsi, həmçinin paytaxtı respublikanın qərb rayonları ilə bağlayan Bakı-Şamaxı-Muğan yolunun təmirini nəzərdə tutan birinci layihə çərçivəsində 200 mln. dollar ayırlıb. Kredit 2006-cı ildə təsdiqlənib.
2008-ci ilin aprelində təsdiqlənən və 300 mln. dollar həcmində olan ikinci kredit hesabına Ələt-Masallı magistral yolun müasirləşdirilməsi, Kürdəmir-Ucar bölməsinin mövcud Bakı-Gürcüstan sərhədi magistral yolunun reabilitasiyası, mövcud Bakı-Şamaxı magistral yolunun reabilitasiyası, Tağıyev qəsəbəsi - Sahil qəsəbəsi avtomagistralının (Bakını dövr etməklə) yenidən qurulması və bəzi bitişik yolların reabilitasiyası nəzərdə tutulub.
Bu yol layihələrinin realizəsində əsаs məqsəd çıxışın, tranzitin və seçilmiş sahələrin, həmçinin Şərq-Qərb və Şimal-Cənub dəhlizlərinin yol təhlükəsizliyinin artırılmasından ibarətdir.
DB infrastruktur layihələri Beynəlxalq Yenidənqurma və İnkişaf Bankı xətti ilə maliyyələşdirilir - yəni kredit ilə 4 il güzəştli dövr olmaqla 20 il müddətinə və illik libor+0,5 faiz dərəcə altında ayrılır.
Müəlliflə əlaqə saxlamaq üçün elektron ünvan: [email protected]
