Azərbaycan, Bakı, 05 fevral / Trend , müx. K.Zərbalıyeva/
Dünya maliyyə böhranı ilə əlaqədar Azərbaycanda kütləvi ixtisarlar qeydə alınmayıb. Azərbaycan Həmkarlar Konfederasiyasının sədri, millət vəkili Səttar Mehbalıyev cümə axşamı jurnalistlərə açıqlamasında bu barədə məlumat verib.
Konfederasiyanın sədri bildirib ki, bir neçə şirkətdə müvəqqəti boşdayanma halları qeydə alınıb.
Mehbalıyevin sözlərinə görə, işçilərin ödənişsiz məzuniyyətə göndərilməsi faktları həm dövlət təşkilatlarında, həm də özəl sektorlarda mövcuddur.
İndiyədək 3 minə yaxın işçinin ödənişsiz məzuniyyətə göndərildiyini deyən Mehbalıyev dünya maliyyə böhranı ilə əlaqədar gözlənilən ixtisarlarla bağlı konkret fikir söyləməyin çətin olduğunu bildirib.
Konfederasiya sədri problemin aradan qaldırılması üçün təkliflər hazırlandığını, təkliflərin Əmək və Əhalinin Sosial Müdafiəsi Nazirliyi və işəgötürmə agentliklərilə müzakirəsindən sonra aidiyyatı orqanlara təqdim olunacağını qeyd edib.
Məqalə müəllifi ilə əlaqə ünvanı:[email protected]
