Azərbaycan, Bakı, 05 fevral / Trend , müxbir А.Bədəlova/ "İqtisadi fəaliyətin Avrozonada zəifliyi yaxın rübdə də davam edəcək", - cümə axşamı Avropa Mərkəzi Bankının (AMB) başçısı Jan-Klod Trişe deyib.
"Bütün dünyada olduğu kimi, Avrozonada da iş fəaliyyət aşağı düşməsi müşahidə olunur. Avrozonadan ixracın azalması, həmçinin inam indeksinin azalması ümumilikdə regionun iqtisadiyyatına mənfi təsir edir", - Trişe "Vesti" telekanalı ilə canlı yayımlanan Frankfurt-Maynda keçirilən mətbuat konfransında qeyd edib.
AMB-nin bugünkü iclasında başlıca olaraq yenidən maliyyələşdirmə stavkasını dəyişiksiz - iki faiz səviyyəsində saxlamaq haqda qərar qəbul edilib. Bir müddət əvvəl İngiltərə Bankı öz faiz stavkasını 50 bazis bəndi aşağı salaraq 1 faizə endirib.
2008-ci ilin oktyabrından AMB baza faiz stavkasını 2,25 faiz bəndinə endirib. Yanvardakı sonuncu iclasda AMB əsas stavkasını 0,5 faiz azaldaraq 2 faizə salmışdı.
Trişenin sözlərinə görə, enerji daşıyıcılarına gözlənilən qiymət azalması inflyasiyanın səviyyəsinə təsir edəcək.
Eurostat-ın məlumatların görə, Avrozonada inflyasiya bu ilin yanvarında, ötən ilin analoji dövrünə nisbətən 1,1 faiz artıb. Bu göstərici 1999-cu ildən bu yana ən minimal artımdır. Ötən ilin dekabrında inflyasiyanın səviyyəsi 1,6 faiz təşkil edib.
Məqalə müəllifi ilə əlaqə ünvanı: [email protected]