Azərbaucan, Bakı, 16 fevral / Trend , müxbir U. İsmayılova/ Azərbaycan İpoteka Fondu (AİF) bu il ipotekaların verilməsini bərpa etmək niyyətindədir. Bu barədə bazar ertəsi AİF icra direktorunun muavini Mustafa Məmmədov bildirib..
"AİF artıq öz təkliflərini müvafiq orqanlara və Nazirlər kabinetinə göndərib", - Məmmədov deyib.
Onun sözlərinə görə, ipoteka kreditlərinin bərpası dövlətin antiböhran proqramının bir hissəsidir.
Təklifə əsas üç bənd daxildir: ipoteka krediti standartlarının mükəmməlləşdirilməsi, şirkətlər arasında portfelin diversifikasiyası və ipoteka kreditlərinin verilməsinin bərpası.
"AİF-in aksioner cəmiyyətdə mulkiyyət formasının dəyişilməsi gözlənilir. Bu da strukturun kommersiya formasında olmasına gətirib çıxaracaq", - Məmmədov deyib.
Nizamnamə kapitalının formalaşması üçün fond 2009-cu ilin dövlət büdcəsindən 14,5 mln.manat ayrılması imkanına baxır. "Bu il bütün addımların atılması gözlənilir", - Məmmədov bildirib.
Milli Bank hökumətlə birgə sosial və kommersiya ipotekasının verilməsinə dair geniş ipoteka krediti modelini araşdırır. Bu barədə bir az öncə Milli Bankın idarə rəisi Elman Rüstəmov deyib. "Bu gün ipoteka krediti ölkədə iş aktivliyini saxlamaq və məşğulluğu təmin etmək üçün çox vacibdir", - Rüstəmov qeyd edib.
AİF ipoteka krediti verən bankları 63,3 mln. manat məbləğində maliyyələşdirib ki, bu da ümumi ipoteka portfeli həcminin 93 faizini təşkil edir. AİF 2006-cı ilin mart ayından 2007-ci ilin iyun ayına qədər 67,9 mln. manat dəyərində mənzillərin alışı üçün kredit verib.
2005-2008-ci illər ərzində ipotekanın maliyyələşdirilməsi üçün dövlət büdcəsindən 80 mln. manat ayrılması nəzərdə tutulsa da, sonda 68 mln. manat ayrılıb.
2009-cu ilə sosial ipotekanın maliyyələşdirilməsi üçün dövlət büdcəsindən 14,5 mln. manat ayrılıb.
Qeyd edək ki, vasitələrin çatışmaması səbəbindən 2007-ci ilin yay ayıarından etibarən AİF ipotekaların verilməsini dayandırmışdı.
Məqalə müəllifi ilə əlaqə ünvanı: [email protected]
