Azərbaycan, Bakı, 27 fevral / Trend , müxbir İ.Xəlilova / Azərbaycan hökumətində ölkənin Milli Bankı (AMB) yanında fəaliyyət göstərən Azərbaycan İpoteka Fondunun (AİF) xətti ilə ipoteka kreditləşməsinin bərpası istiqamətində məsləhətləşmələr davam etdirilir. Bu barədə cümə günü AMB-nın idarə heyətinin sədri Elman Rüstəmov bildirib.
"Bu gün ipoteka aləti, həmçinin tikinti bazarı ilə bağlı olan sahələr ölkədə işgüzar fəallığın saxlanılması, məşğulluğun təmin edilməsi üçün çox vacibdir. Bunun üçün biz istənilən üsul ilə fəallığı saxlamalıyıq və bu işdə ipotekanın bərpa olunması mühüm rol oynaya bilər", - deyə Rüstəmov bildirib.
Onun sözlərinə görə, bu gün bazarda kifayət qədər yüksək təkliflər var və ipoteka mexanizmi tikinti bazarında staqnasiyanın qarşısnı almağa, həmçinin başlanan yaşayış binaları tikintisini davam etdirməyə imkan verəcək.
İpotekanın əsas mexanizmi AİF-in qiymətli kağızlar buraxmasıdır, bunula bağlı Milli Bankda müvafiq strukturlarla görüş keçirilib.
"Onların emissiyaları qanunvericiliklə buraxılır və Milli Bank bu ipoteka kağızlarına zəmanət verməyə hazırdır. Onlar zəmanətli qiymətli kağızlar səviyyəsinədək çatdırılacaq ki, bu da bazarda onların likvidliyinin təmin edilməsinə imkan yaradacaq və müvafiq olaraq ipoteka bazarının fəallaşmasına gətirib çıxaracaq", - deyə Rüstəmov bildirib.
Bu günədək İpoteka Fondu 65 mln. manat yerləşdirib və qiymətli kağızlar məhz bu həcmdə buraxıla bilər. Bu, AMB rəhbərinin rəyinə görə, ölkənin fond bazarının genişləndirilməsi və dirçəlməsinə imkan yaradacaq.
Rüstəmovun sözlərinə görə, ipoteka kreditləri üzrə faiz dərəcələrinin dəyişdirilməsi planlaşdırılmır.
"İpotekanın kommersiyalaşdırılması prinsiplərindən biri dərəcələrin dəyişdirilməsidir, lakin vəziyyətin çətinləşməsi ilə əlaqədar biz öz mövqeyimizi bir neçə dəfə nəzərdən keçirdik və buna görə, faiz dərəcələrini dəyişməyi planlaşdırmırıq. Dünya prosesləri kontekstində ipoteka krediti alanlar üçün şərtlərin sadələşdirilməsi zəruri olacaq", - deyə Rüstəmov bildirib.
Onun fikrincə, kreditlər sabit gəlirli borc alanlara təqdim olunmalıdır, çünki dünya böhranı ipoteka bazarından başlanıb.
Azərbaycan İpoteka Fondu bu günədək səlahiyyətli banklar tərəfindən ayrılan ipoteka kreditlərini 63,3 mln. manat səviyyəsində təkrar maliyyələşdirib ki, bu da ipoteka portfelinin ümumi həcminin 93 faizini təşkil edir. 2006-cı ilin martından 2007-ci ilin iyununadək AİF-in mənzil alqısının maliyyələşdirilməsi üzrə fəal əməliyyatlar apardığı dövr ərzində banklar tərəfindən 67,9 mln. manat həcmində ipoteka krediti verilib.
2005-ci ildən 2008-ci ilədək olan dövrdə Azərbaycanın dövldət büdcəsində AİF vasitəsilə ipotekaların maliyyələşdirilməsi üçün 80 mln. manat nəzərdə tutulmuşdu ki, onun 68 mln. manatı artıq ayrılıb.
Sosial ipotekanın maliyyələşdirilməsi üçün 2009-cu ilin dövlət büdcəsinə 14,5 mln. manat yatırılıb.
Fevralın 27-nə olan rəsmi məzənnə 0,8052 AZN/USD təşkil edir.
Məqalə müəllifi ilə əlaqə ünvanı: [email protected]
