Azərbaycan, Bakı, 27 fevral / Trend , müxbir S.Babayeva / Azərbaycanda Beynəlxalq Kənd Təsərrüfatı Fondunun (IFAD) iştirakı ilə yeni layihənin realizəsi başlanıb. Onun prezentasiyası cümə günü ölkənin kənd təsərrüfatı naziri İsmət Abbasovun iştirakı ilə keçirilib.
"Layihə Azərbaycanın şimal-qərb regionlarının inkişafına və regionun gəlirlərinin kənd təsərrüfatı istehsalı hesabına artırılmasına yönəldilib", - IFAD-ın ölkə üzrə direktoru Əbdülkərim Sma deyib.
Azərbaycanın şimal-qərb rayonlarının inkişafı layihəsi dörd komponentdən ibarətdir: suvarma sistemlərinin bərpası və birgə idarə olunması (dəyəri 20,8 milyon dollar); kənd təsərrüfatının inkişafı (3,8 milyon dollar); kommersiya müəssisələrinə maliyyə xidmətləri və yardım (4,9 milyon dollar); layihənin idarə olunması və koordinasiyası (2,6 milyon dollar).
Beş ilə hesablanmış layihənin ümumi dəyəri 32,3 milyon dollardır. Onlardan 17,2 milyon dollar IFAD, 13 milyon dollar isə Azərbaycan hökuməti, 1,6 milyon benefisiarlar, 500 min dollar maliyyə strukturlarının payına düşür.
Layihənin məqsədi kənd əhalisinin yaşayış şəraitinin yaxşılaşdırılması və Azərbaycanın dörd rayonu - Şəmkir, Qazax, Tovuz və Ağstafada ərzaq təhlükəsizliyini təmin etməkdir.
Bu gün Azərbaycanda ölkənin şimal-qərb regionlarının inkişafı üzrə layihə (North Development Project) həyata keçirilir ki, bu da 15012 ailənin yaşayış şəraitinin yaxşılaşdırılmasına imkan verəcək. Layihənin Abşeron, Siyəzən, Dəvəçi və Xızıda həyata keçirilməsi hesabına ikinci və üçüncü dərəcəli suvarmalar, əsasən kasıblığın səviyyəsinin azaldılmasına yönəldilmiş marketinq tədbirləri realizə olunur.
Layihənin dəyəri 25,1 milyon dollar həcmində qiymətləndirilir ki, onun da 12 milyon dolları IFAD tərəfindən ayrılıb.
Məqalə müəllifi ilə əlaqə ünvanı: [email protected]
