Azərbaycan, Bakı, 05 mart / Trend , müxbir S.Babayeva / "Naxçıvan Muxtar Respublikasına (NMR) 2009-cu ilin yanvarında yönəldilən sərmayələr 2008-ci ilin analoji dövrü ilə müqayisədə 25,1 faiz artaraq 12 milyon manat təşkil edib", - NMR-in Bakıdakı daimi nümayəndəliyindən məlumat verilib.
Ay ərzində NMR tikinti şirkətləri tərəfindən 11,4 milyon manatlıq iş görülüb. Bu bir il əvvəlki göstəricilərdən 29,4 faiz artıqdır. Tikinti sektoruna yönəldilən sərmayələr NMR-ə yönəldilən bütün qoyuluşların 94,5 faizini təşkil edir.
Yanvar ayında muxtariyyətin tikinti şirkətləri tərəfindən öz vəsaitləri hesabına 9,9 milyon manatlıq tikinti işləri aparılıb. Bu sərmayələrin 6,4 milyon manatı yeni tikililərdə işlərin aparılması, 2,8 milyon manatı əsaslı təmirə, 583,4 min manatı cari təmirə, 74,2 min manatı digər tikinti işlərinə yönəldilib.
Məqalə müəllifi ilə əlaqə ünvanı: [email protected]
