Gürcüstan, Tbilisi, 05 mart / Trend , müxbir N. Kirtsxaliya /
Gürcüstan Prezidenti Mixail Saakaşvili və Türkiyənin Baş naziri Rəcəb Tayyip Ərdoğan Türkiyə tərəfindən yeniləşdirilmiş "Sarpi" NBM-in (Nəzarət Bıraxılış Məntəqəsi) açılış mərasimində iştirak edib. Yenilənmiş NBM iki ölkə arasında yük və turist axınının sürətlənməsinə şərait yaradacaq.
Saakaşvilinin sözlərinə görə, Türkiyə Gürcüstanın əsas ticarət partnyorudur və qarşıdakı illərdə iki ölkə arasındakı əmtəə dövriyyəsinin beş milyard dollara qədər artırılması nəzərdə tutulub. "NBM-in müasirləşdirilməsi də buna şərait yaradacaq", - dövlət başçısı qeyd edib.
Saakaşvili Türkiyəyə dəstəyi üçün minnətdarlığını bildirib və qeyd edib ki, Ankara regionda iqtisadi və siyasi layihələrin həyata keçməsi istiqamətində vacib oyunçulardan biridir. Prezident mərasimdə toplaşanlara həm gürcü, həm də türk dillərində müraciət edib. "Beş il əvvəl qardaşım Ərdoğanla sərhədin bağlı olan bu hissəsini vətəndaşlarımız üçün açacağımız barədə danışmışdıq", - Saakaşvili bu vədin həyata keçirildiyini bildirərək qeyd edib.
"O zaman Ərdoğan söyləmişdi ki, ölkələrimiz arasında viza olmayacaq, onlar ləğv edilib. O söyləmişdi ki, ölkələrimiz arasında artıq mövcud olan azad ticarət olacaq", - Saakaşvili Gürcüstan və Türkiyənin müştərək aeroport açması münasibətilə Türkiyə baş nazirinə minnətdarlığını bildirərək əlavə edib.
"Bu gün Batumi artıq dalan deyil - o Türkiyə ilə sərhədlərin açılması nəticəsində yeni turizm oazisinə çevrilib", - deyə Gürcüstan dövlət başçısı qeyd edib.
Gürcüstan Prezidenti qeyd edib ki, Ankara və Tbilisinin bütün səyləri iki xalqın yaxınlaşmasına yönəlib. "Biz türklərin və gürcülərin olduğu, vətəndaşlara xidmətdə vaxta 70 faiz qənaət edilməsinə imkan verən vahid gömrük xidmətinin yaradılmasına qərar vermişdik. Bu İsveçrə və Türkiyədən başqa heç yerdə yoxdur. Biz belə NBM-in Azərbaycan-Ermənistan sərhəddində də yaradılmasını istəyirik ", - deyə Saakaşvili bildirib.
Onun sözlərinə görə, tezliklə türklər NBM-in Gürcüstan hissəsini də inşa edəcəklər, bundan sonra sərhəd, ölkələrimizi ayırmayacaq, əksinə birləşdirəcək".
"Gürcüstan Türkiyənin strateji-iqtisadi layihələrin həyata keçirilməsi istiqamətində etibarlı tərəfdaşıdır", - deyə Ərdoğan bildirib. "Biz hər zaman dəstəkləməyə hazır olduğumuz stabil və vahid Gürcüstana maraqlıyıq", - Baş nazir qeyd edib.
Onun sözlərinə əsasən, yeni NBM ölkələrimiz arasındakı ticarət münasibətlərinin intensivləşməsinə, eyni zamanda turizmin inkişafına şərait yaradacaq. "Biznesimiz Gürcüstanın iqtisadi həyatında fəal iştirak etməyə hazırdır və tezliklə mövcud iqtisadi böhrana baxmayaraq bu, baş verəcək", - deyə Baş nazir qeyd edib.
"Bu sərhəd ölkələrimizi ayırmır, əksinə onları birləşdirir və bunun üçün biz bütün bürokratik problemləri aradan qaldırırıq",- Gürcüstan Prezidenti NBM-in vahid idarəsinin yaradılması təşəbbüsünü bəyənərək qeyd edib.
"Mən sevinirəm ki, xalqlarımız arasındakı qardaşlıq əlaqələri tez bir zamanda inkişaf edir. Mən deyə bilərəm ki, biz bir ailənin üzvləriyik və Türkiyə hər zaman Gürcütanın yanındadır", - deyə Ərdoğan bildirib.
NBM-in Türkiyə hissəsinin açılışından sonra Ərdoğan və Saakaşvili yenidən Batumiyə qayıdaraq Sarpi səfəri üçün yarımçıq qoyduqları görüşü davam etdiriblər.
Məqalə müəllifi ilə əlaqə ünvanı: [email protected]