Qazaxıstan, Astana, 11 mart / Trend , müxbir K.Arınova /
Vahid dünya valyutası dünya maliyyə böhranından çıxmanın bir yolu ola bilər. Bu barədə çərşənbə günü Astanada "Qlobal risklər sistemində Avrasiyanın iqtisadi təhlükəsizliyi" II Astana İqtisadi Forumunu açıq elan edən Qazaxıstan Prezidenti Nursultan Nazarbayev bildirib.
"Dünyada vəziyyətin dəyişdirilməsi variantlarından biri vahid dünya valyutasının yaradılması ola bilər", - deyə Nazarbayev bildirib.
Prezident əlavə edib ki, onu əvvəllər təklif olunan "altın" əvəzinə "avras" və ya "avrasiya" adlandırmaq olar.
Nazarbayev vahid dünya valyutasının yaradılması strategiyası ilə məşğul olacaq işçi qrupunun yaradılmasını təklif edib.
"Biz bu işçi qrupunun fəaliyyəti üçün Astanada hər bir şərait yaratmağa hazırıq. Ola bilsin ki, mənim vahid dünya valyutasının yaradılması ilə bağlı ideyam kiməsə həddindən artıq cürətli və anlaşılmaz gələ bilər, lakin forum ərəfəsində dünyanın aparıcı ekspertləri ilə keçirdiyim görüşlər göstərdi ki, bizim fikirlərimiz eynidir".
Çıxışını yekunlaşdıran Qazaxıstan Prezidenti növbəti iqtisadi forumun 2010-cu ilin iyulunda Astanada keçirilməsini təklif edib.
"Biz bir il ərzində bu forum zamanı səsləndirilən ideyalar üzrə müəyyən işlər apara bilərik", - deyə Prezident bildirib.
Məqalə müəllifi ilə əlaqə ünvanı: [email protected]
