Azərbaycan, Bakı, 29 mart / Trend , müxbirlər İ.Xəlilova, S.Babayeva /
Azərbaycan və Fransa kənd təsərrüfatı layihələri çərçivəsində əməkdaşlığın genişləndirilməsi və davam etdirilməsində maraqlıdır. Bu barədə Azərbaycanın kənd təsərrüfatı nazirinin müavini Bəhram Əliyev bildirib.
"Bizim davam etdirmək istədiyimiz bir sıra birgə layihələr var və biz Azərbaycan-Fransa hökumətlərarası komissiyasının iclası çərçivəsində bununla bağlı təklif irəli sürmüşük", - deyə Əliyev bildirib.
Onun sözlərinə görə, bitkiçilik üzrə layihələr xüsusi əhəmiyyət kəsb edir. Beləliklə, Fransadan gətirilən növlər hesabına (Kur-Araz ovalığında) əkin sahələrinin artırılması; Frazer layihəsi çərçivəsində yeni alma növlərindən 20 mln. ədədin alınması; şərabçılıq şirkətləri ilə yeni sazişlərin imzalanması; daha məhsuldar olan üzüm, buğda əkini sahələrinin genişləndirilməsində qarşılıqlı maraq var.
İqtisadi əməkdaşlıq üzrə Azərbaycan-Fransa hökumətlərarası komissiyasının beşinci iclası martın 19-da Bakıda keçirilib. Azərbaycan tərəfdən komissiyanın həmsədri maliyyə naziri Samir Şərifov, Fransa tərəfdən isə xarici ticarət üzrə dövlət katibi Ann-Mari İdrakdır (Anne-Marie Idrac).
2008-ci ildə Azərbaycan ilə Fransa arasında mal dövriyyəsi 2,5 mlrd. dollar təşkil edib.
Bununla yanaşı, 0,13mlr. dollarlıq idxal, 2,3 mlrd. dollarlıq isə ixrac əməliyyatları həyata keçirilib.
Məqalə müəllifi ilə əlaqə ünvanı: [email protected]