Qazaxıstan, Astana, 14 aprel / Trend , müxbir K.Arınova/
Qazaxıstanda 2009-cu ilin birinci kvartalında işsiz əhalinin sayı ötən kvartaldakı göstəricidən 23,6 min nəfər (4,2 faiz) artaraq 582,8 min nəfər təşkil edib. Məlumatı Qazaxıstan Statistika Agentliyi verib.
"Rəsmi olaraq məşğulluq orqanlarında martın sonlarınadək 71,2 min (iqtisadi aktiv əhalinin 0,8 faizi) insan qeydiyyatdan keçib. Martda işsizlərin sayı 589,6 min, işsizliyin səviyyəsi isə 7 faiz təşkil edib", - mətbuat xidmətinin məlumatında deyilir.
Beynəlxalq Əmək Təşkilatının standartlarına əsasən, işsiz olan, inadla iş axtaran və işləməyə hazır olan şəxslər işsiz hesab olunurlar. İstehsalatda ixtisar baş verdikdə əmək bazarında işçilərin natamam məşğulluq faktları aşkar edilir. Bu səbəbdən gizli işsizliyin izinə düşmək lazımdır. Qiymətləndirməyə görə, martda iqtisadi aktiv əhalidə gizli işsizliyin səviyyəsi 1,7 faiz təşkil edib.
Gizli işsizlik (məcburi natamam məşğulluq) qısa iş həftəsi rejimində, yaxud natamam iş günündə işləyən işçilərin kəmiyyətini, əmək haqqı saxlanılmadan administrativ məzuniyyətdə olan işçilərin sayını müəyyən edir.
Məqalə müəllifi ilə əlaqə ünvanı: [email protected]