Azərbaycan, Bakı, 05 may / Trend , müxbir Ü.İsmayılova /
Azərbaycan Sığortaçılar Assosiasiyası Türkiyənin Əməkdaşlıq və İnkişaf İdarəsi ilə (TİKA) birgə Azərbaycan sığortaçıları üçün giriş kursunun keçirilməsini planlaşdırıblar. Bu barədə Assosiasiyanın icraçı direktoru Qafar Məcidov deyib.
"Giriş kursuna mayda başlamaq planlaşdırılıb", - Məcidov qeyd edib.
Onun sözlərinə əsasən, kurslar sığortanın bütün mövcud növlərini əhatə edəcək.
Məşğələləri Türkiyə Sığorta İnstitutundan olan üç pedaqoq aparacaq.
Kursun müddəti bir ay (100 saat), təhsil haqqı 500-600 manat təşkil edir.
Məcidovun sözlərinə əsasən, kursu uğurla başa vuran sığortaçılar Türkiyənin Sığorta İnstitutunda təhsillərini davam etdirə bilərlər. Sözügedən institutun sertifikatı London Sığorta İnstitutu tərəfindən tanınıb.
Bir çox ölkələrdə TİKA müxtəlif humanitar-sosial, kommunikasiya və mədəniyyət layihələri ilə çıxış edib. Bütün bunlar yerli əhalidə Türkiyə və onun siyasətinə qarşı müsbət münasibətin formalaşdırılmasında böyük rol oynayır.
Azərbaycan Sığortaçılar Assosiasiyası 2006-cı ilin dekabrında təsis edilib. Assosiasiyanın Müşahidəçilər Şurasına beş şirkət daxildir: MBASK, Standard Insurance, Beynəlxalq Sığorta Şirkəti, Azərisığorta və Atəşgah. Bundan əlavə, fəaliyyətdə olan bütün sığorta şirkətləri Assosiasiyanın üzvüdür.
Məqalə müəllifi ilə əlaqə ünvanı: [email protected]
