Azərbaycan, Bakı, 06 may / Trend , müxbir İ.Xəlilova /
Paşa Bank ASC inkişaf strategiyası çərçivəsində Azərbaycan bank sektorunda "Private Banking"in tam xidmətlərini təqdim etmək istəyir ki, bu da bank qanunvericiliyinə düzəlişlərdən sonra mümkündür. Bu barədə bankın İdarə Heyyətinin sədri Fərid Axundov çərşənbə günü deyib. Paşa Bank 2007-ci ilin iyun ayında yaradılıb və Mərkəzi Bankın 2007-ci il yanvarın 28-də verdiyi lisenziya əsasında fəaliyyət göstərir.
"Strategiyanın həyata keçirilməsinə 2009-cu ildən başlanılıb və 2011-ci ilə kimi nəzərdə tutulub. "Private Banking"in tətbiqinə vaxt lazımdır və hazırda bank heyətinin, infrastrukturun prosesə hazırlığı aparılır", - Axundov qeyd edib.
Paşa Bank-ın fəaliyyət sferasına korporativ müştərilərə və fərdi şəxslərə xidmət, ailəyə kompleks xidmətlər, uşaqların təhsil almaları üçün tələbatların ödənilməsi, personal biznresin maliyyələşdirilməsi və s. daxildir.
"Biz pərakəndə sektoru maliyyələşdirmədiyimizə görə ipoteka kreditləşməsi fəaliyyət sahəmizə daxil olmayacaq. Müxtəlif sahələrə xidmət göstərsək də, fəaliyyətimizin əvvəlindən tikinti sektoruna ehtiyyatla yanaşmışıq", - Axundov deyib.
Bununla belə, Axundov bankın iri layihələrdə maraqlı olduğunu bildirib və misal olaraq biznes-mərkəzlərin tikintisini göstərib. Ümumilikdə, Paşa Bank Mərkəzi Bankın iri layihələrlə bağlı limitləri ilə yanaşı öz sistemi daxilində sektorlar üzrə xidmətlərə limit tətbiq edir. Axundovun sözlərinə görə, Paşa Bank aqrar sənəye, farmaseftika, ticarət və nəqliyyat sektorunun maliyyələşdirilməsinə maraq göstərir.
"Bankın missiyası biznesin şəffaf aparılması qaydalarına və ölkənin bank sektorunun şəffaflığına əsaslanaraq korporativ müştərilərə xidmət göstərilməsindən və "Private Banking" üzrə liderlər sırasında olmaqdan ibarətdir", - bank rəhbəri vurğulayıb.
Onun sözlərinə əsasən, bank illik dövriyyəsi 1 milyon manatdan 10 milyon manatadək olan kiçik şirkətlərlə iş birliyinə hazırdır.
"Yeni idarəetmə metodları tətbiq edən şirkətlərlə işləməyə hazırıq", - Axundov əlavə edib.
Paşa Bank ASC PAŞA Holding şirkətlər qrupuna daxildir. Bankın səhmlərinin 60%-i PAŞA Holding-ə, 30%-i ADOR ltd şirkətinə və 10%-i Arif Paşayevə məxsusdur.
Mayın 6-na olan rəsmi məzənnə 0,8036 AZN/USD təşkil edir.
Məqalə müəllifi ilə əlaqə ünvanı: [email protected]
