Azərbaycan, Bakı, 06 may / Trend , müxbir İ.Xəlilova /
"Paşa Bank" ASC 100 milyon manat təşkil edən iri nizamnamə kapitalı hesabına (Paşa Bank kapital həcminə görə ölkənin bank sektorunda ikinci yeri tutur) Azərbaycan Dövlət Neft Fondunun agenti funksiyasını yerinə yetirməkdə davam edir. Bu barədə Paşa Bankın idarə heyətinin sədri Fərid Axundov deyib. Paşa Bank 2007-ci ilin iyun ayında yaradılıb və Azərbaycan Mərkəzi Bankının 2007-ci il yanvarın 28-də verdiyi lisenziya əsasında fəaliyyət göstərir.
"Bizim bankı, bir sıra banklarla yanaşı, Dövlət Neft Fondu tərəfindən xarici səhmlərin sonradan satışı zamanı bu səhmlərin alınması üçün seçiblər", - Axundov qeyd edib.
Onun sözlərinə əsasən, Paşa Bank banklararası bazarda valyuta əməliyyatlarının aktiv iştirakçısıdır. Bakı Banklararası Valyuta Birjası (BBVB) ölkənin birja valyuta bazarının gələcək inkişafı məqsədilə market-meyker institutunun formalaşdırılmasına başlayıb. Paşa Bank BBVB-də BEST elektron hərrac sistemində market-meyker seçilib. Market-meyker olaraq Paşa Bank BEST ticarət sistemində yalnız USD/AZN T+0 aləti üzrə həraclar keçirmək öhdəliyi götürüb. Market-meyker sözügedən alət üzrə birja komissiyası ödəmələrindən azad edilir.
Market-meyker institutunun yaradılması birja bazarının likvidliyinin artırılması məqsədini güdür.
Market-meyker statusunu BBVB-nin valyuta seksiyası üzvləri bir və ya bir neçə alət üzrə ala bilər.
Paşa Bank "PAŞA Holding" şirkətlər qrupuna daxildir. Bankın səhmlərinin 60%-i PAŞA Holding-ə, 30%-i ADOR Ltd. şirkətinə və 10%-i Arif Paşayevə məxsusdur.
Mayın 06-na olan rəsmi məzənnə 0,8036 AZN/USD təşkil edir.
Məqalə müəllifi ilə əlaqə ünvanı: [email protected]
