Azərbaycan, Bakı, 26 may / Trend , müxbir N.İsmayılova /
Beynəlxalq Maliyyə Korporasiyası (IFC) Azərbaycanda korporativ idarəetmənin müasir standartlarının tətbiq edilməsi çərçivəsində Qiymətli Kağızlar üzrə Dövlət Komitəsi (QKDK) ilə ölkənin Mülki Məcəlləsinə dəyişikliklərin edilməsi barədə danışıqlara başlayıb. Bu barədə çərşənbə axşamı IFC layihəsinin rəhbəri Karolina Brayt deyib.
"Biz QKDK ilə Mülki Məcəlləyə dəyişikliklər barədə danışıqlara bir neçə ay əvvəl başlamışıq. Lakin hələ də məcəlləyə dəyişikliklərlə bağlı qərar qəbul edilməyib", - Brayt qeyd edib.
Onun sözlərinə əsasən, korporasiya tərəfindən bir müddət öncə təklif edilmiş iki dəyişiklik hələ il yarım əvvəl qəbul edilib.
Layihə çərçivəsində Mülki Məcəllənin maraq doğuran sazişləri üzrə düzəlişlər də daxil olmaqla, Azərbaycan Hökuməti tərəfindən qəbul edilən cəmi 4 qanun layihəsi hazırlanıb.
Maraq doğuran sazişlər o sazişlərdir ki, onun həyata keçirilməsində bilavasitə direktorlar şurasının (müşahidə şurasının), cəmiyyətin, cəmiyyətin vahid icra orqanı funksiyasını həyata keçiən şəxsin, 20 faiz səsvermə hüququna malik cəmiyyət və ya səhmdar cəmiyyətin kollegial icra orqanının üzvünün, eləcə də cəmiyyətə mütləq olan tapşırıqları vermək ixtiyarında olan şəxsin maraqları var.
Məqalə müəllifi ilə əlaqə ünvanı: [email protected]
