Azərbaycan, Bakı, 27 may / Trend /
"Bu gün Azərbaycanın kapital bazarının inkişafı üçün beynəlxalq donorlarla məsləhətləşmə üçün görüş təşkil edilib", - çərşənbə günü Azərbaycanın Qiymətli Kağızlar üzrə Dövlət Komitəsinin sədri Rüfət Aslanlı görüşdən əvvəl deyib.
Son aylar ərzində qiymətli kağızlar bazarı tədqiq olunub. Bunun nəticəsində layihələr hazırlanıb. Onların realizəsi üçün beynəlxalq maliyyə institutları və donor təşkilatlar texniki yardım göstərilməsi təşəbbüsü ilə çıxış ediblər.
"Birinci məsləhət müşavirəsinin əsas məqsədi təşəbbüslərə baxmaq və texniki yardım təkliflərini səmərəli koordinasiya etməkdir. Bizim üçün vacib olan odur ki, prioritet saydığımız layihələr texniki yardım alacaq", - Aslanlı deyib.
Onun sözlərinə görə, bununla yanaşı, gələcəkdə texniki yardım altında olan layihələrin təkrarlanmaması üçün institusional forma yaradılır.
Təşəbbüslər qanunvericilik sahəsi, qiymətli kağızlar bazarının ticarət sisteminin avtomatlaşdırılması və təkmilləşdirilməsini, fond bazarı iştirakçılarının potensialının yüksəldilməsini və onların bazardakı iştirak imkanlarının genişləndirilməsini əhatə edir. Maarifləndirmə və treninq proqramları üzərində də iş aparılır.
"Biz altı prioritet istiqamət müəyyən etmişik və onların hər biri istiqamətində donorlarla məsləhətləşmələr aparırıq", - Aslanlı bildirib.
