Azərbaycan, Bakı, 17 iyun / Trend , müxbir N.İsmayılova /
"Azərbaycan Mərkəzi Bankının açıqladığı ödəmə balansına əsasən, Azərbaycanın xarici strateji valyuta ehtiyatları il ərzində 72,3 % artaraq 2009-cu il 1 aprel tarixinə 16047.3 mln. dollar təşkil edib", - çərşənbə günü AMB-dən deyilib. Bunun da 10512.8 mln. dolları Dövlət Neft Fondu aktivlərinin, 375 mln. dolları hökumət depozitlərinin, 5 159,5 mln. dolları isə Mərkəzi Bankın məcmu beynəlxalq aktivlərinin payına düşür.
Mərkəzi Bankın sərəncamında olan rəsmi valyuta ehtiyatları 4961,8 mln. dollardır ki, bu da neft-qaz sektoru istisna olmaqla malların və xidmətlərin 10 aylıq idxalını maliyyələşdirməyə imkan verir.
Ödəmə balansına görə, gəlirlər üzrə daxilolmaların və ödənişlərin ümumi dövriyyəsi 483 mln. dolları ötüb ki, bunun da 72,2%-ni (348,6 mln.dollar) respublikada ödənişlər təşkil edir. Bu məbləğin isə əsas hissəsini (126,7 mln. dollar) Azərbaycan Beynəlxalq Əməliyyat Şirkətinin xarici investorlarının payına düşən gəlirlərinin repatriasiyası (xam neft şəklində), qeyri-rezidentlərə ödənilmiş əmək haqları (28,8 mln. dollar) və xarici kreditlərdən istifadəyə görə ödənilən faizlər (neft-qaz sektoru da daxil olmaqla 67,1 mln. dollar) təşkil edir.
Ölkəyə daxil olan gəlirlər 2008-ci ilin analoji dövrü ilə müqayisədə 33,1 faiz artaraq 134,3 milyon dollar təşkil edib. Bunun da 92,9 mln. dollarını Dövlət Neft Fondunun vəsaitlərinə, 11,9 mln. dollarını Milli Bankın sərəncamında olan xarici valyuta ehtiyatlarına və 2,8 mln. dollarını bankların xaricdə yerləşdirilmiş aktivlərinə hesablanmış faizlər üzrə gəlirlər təşkil edir.
Məqalə müəllifi ilə əlaqə ünvanı: [email protected]
