Azərbaycan, Bakı, 01 iyul / Trend , müxbir İ.Xəlilova /
"Bakı Fond Birjasının (BFB) Müşahidə Şurası çərşənbə axşamı yeni listinq qaydalarını və listinq komissiyasının yaradılmasını təsdiqləyib", - çərşənbə günü birjadan deyilib.
İclasda BFB-nin beş əməkdaşından ibarət listinq komissiyasının yaradılması haqqında qərar qəbul edilib.
Yeni listinq qaydaları 2009-cu il avqustun 1-dən qüvvəyə minəcək. BFB, həmçinin geniş ictimaiyyət dairələri üçün yeni qaydaların təqdimatını planlaşdırır.
Listinq qaydalarında üç səviyyə nəzərdə tutulub: iki listinq və bir listinqdənkənar səviyyə. Birinci səviyyə şirkətlər üçün daha sərt tələblər irəli sürəcək. Bura, həmçinin korporativ idarəetmə, şirkətin özünün fəaliyyəti daxildir. İkinci səviyyə daha sadələşdirilmiş səviyyədir. Üçüncü səviyyə isə öz səhmlərini birja vasitəsilə satmaq istəyən, amma listinqi keçməyən şirkətlərin satışlara buraxılmasıdır.
Bir müddət əvvəl birja idarə heyətinin sədri Xəyal Abdinov deyib ki, birinci səviyyəyə 10-15 şirkətin buraxılışı nəzərdə tutulub. İkinci səviyyədə nisbətən daha çox şirkət olacaq, çünki nizamnamə kapitalının artırılması ikinci səviyyə vasitəsilə aparılacaq.
Onun sözlərinə görə, dövlət qiymətli kağızları üzrə özəl xüsusi rejim olacaq və listinq qaydaları onlara tətbiq edilməyəcək.
Məqalə müəllifi ilə əlaqə ünvanı: [email protected]
