Azərbaycan, Bakı, 13 avqust / Trend , müxbir N. İsmayılova /
Azərbaycanda ipoteka kreditləşməsinə yenidən başlanmasından etibarən (2009-cu il iyunun 1-dən) Ata Bank Mərkəzi Bank yanında fəaliyyət göstərən Azərbaycan İpoteka Fondunun (AİF) xətti ilə 1,1 milyon manatdan çox məbləğdə 23 ipoteka krediti verib. Bu barədə cümə axşamı bankdan bildirilib.
Bu günə bankdan 4,7 milyon manatdan çox məbləğdə 111 ipoteka krediti verilib. Cari ilin əvvəlinə qədər bank şəxsi vəsaiti hesabına 3,6 milyon manatlıq ipoteka kreditləri verib. İyunun 1-nə olan məlumata görə, bankın iki müştərisi artıq ümumi məbləği 430 min manat olan kreditlərini tam ödəyib.
AİF-in şərtlərinə görə, Azərbaycanda verilən adi ipoteka kreditinin maksimal məbləği 50 min manatdır. Belə kreditlər 8 faizlə 25 il müddətinə verilir. İlkin ödəniş alınan mənzilin dəyərinin 15 faizi qədərdir.
Sosial ipotekanın ən yüksək məbləği isə 35 min manatdır, 4 faizlə 30 il müddətinə verilir. Adi və güzəştli kreditlər üçün ilkin ödəniş 15 faizdir.
İpoteka kreditinin bərpası ilə əlaqədar olaraq 17 bank, 7 qiymətləndirmə və 10 sığorta şirkəti AİF-in səlahiyyətlisi təsdiq olunub.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir, ipotekanın obyekti yalnız mənzil və şəxsi ev ola bilər, ipoteka kreditləşməsinin məbləği bazar qiymətlərinin 85 faizini keçməməlidir, kredit üzrə aylıq ödəmə borc götürənin aylıq gəlirinin 70 faizini keçməməlidir, həyat sığortasının məbləği ipoteka kreditindən çox olmalıdır və s.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox stajı olan dövlət qulluqçularına, elmlər namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli ipoteka krediti almaq hüququ var.
2005-2008-ci illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manat ayrılması nəzərdə tutulub. 2009-cu il üçün dövlət büdcəsində sosial ipotekanın maliyyələşdirilməsi üçün 14 milyon manat nəzərdə tutulub. Bundan əlavə AİF 55 milyon manatlıq istiqrazlar buraxıb. Bunun 25 milyon manatı artıq yerləşdirilib.
Avqustun 13-nə olan cari məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
