Azərbaycan, Bakı, 28 avqust / Trend , müxbir Ü.İsmayılova /
Azərbaycan Sahibkarları Milli Konfederasiyası (ASMK) şəhərlərdə və regionlarda sahibkarların mövcud problemlərinin həlli üçün ölkə hökumətinə müraciət etmək niyyətindədir. Bu barədə cümə axşamı Konfederasiyanın prezidenti Məmməd Musayev məlumat verib.
"Sahibkarlar Konfederasiyası hazırda strukturunu təkmilləşdirir və artıq sahibkarların cəlb olunması, onların problemlərinin öyrənilməsi üçün 10 regional nümayəndəlik yaradılıb", - Musayev deyib.
Onun sözlərinə görə, ASMK Beynəlxalq Maliyyə Korporasiyası ilə birgə bu yaxınlarda Gəncədə sahibkarlarla onların problemlərinin müzakirəsi və öyrənilməsi üçün görüş keçirib. Sentyabrda belə görüşün Lənkəranda, gələcəkdə isə ölkənin digər regionlarında keçirilməsi planlaşdırılıb.
"Bu görüşlərin yekunu üzrə müvafiq dövlət strukturlarına təqdim olunmaq üçün təkliflər paketi hazırlanacaq", - Musayev deyib.
Azərbaycanda 80 mindən çox sahibkar fəaliyyət göstərir. Onların inkişafı məqsədilə İqtisadi İnkişaf Nazirliyi yanında Sahibkarlığa Yardım Milli Fondu 2009-cu il üçün nəzərdə tutulmuş 130 milyon manatlıq vəsaitdən (74 milyon manat dövlət büdcəsindən ayrılıb, qalan məbləğ isə əvvəl verilmiş kreditlər üzrə qaytarılan vəsaitlərin payına düşür) 40 faizini artıq xərcləyib.
"Bu onu göstərir ki, Azərbaycanda sahibkarların maliyyə problemləri məqsədyönlü həll edilir", - Musayev deyib.
Məqalə müəllifi ilə əlaqə ünvanı: [email protected]
